Shërbimi sekret shtetëror figuron të jetë i implikuar në rastin e rezervave shtetërore, siç bëjnë të ditur dokumentet hetimore të rastit. AKI’ja, thuhet në dosje, ua ka rekomanduar zyrtarëve që kontratat për rezervat shtetërore të klasifikoheshin si sekrete, përkundër që ligji parasheh që blerja e artikujve të rezervave shtetërore të bëhet përmes procedurave të prokurimit të hapur.
Në dëshmitë e dhëna nga akterët e përfshirë në rastin e rezervave shtetërore, bëhet e ditur se rekomandimin që rezervat shtetërore të klasifikohen si “sekretë” e morën nga disa zyrtarë të AKI’së. Të paktën, kështu thuhet në dosjen e Prokurorisë Speciale, të cilën e ka parë Gazeta Insajderi.
Ish-sekretari i përgjithshëm në Ministrinë e Industrisë, Irfan Lipovica, në deklaratën e dhënë përpara hetuesisë ka thënë se morën rekomandim nga një zyrtar i AKI’së për të vepruar në mënyrë sekrete lidhur me rezervat shtetërore.
“Lidhur me çështjen e deklaratës se konfidencialitetit, i njëjti ka pohuar gjithashtu se në mënyrë verbale e kishin marrë një rekomandim nga një zyrtarë i AKI-së për të vepruar në atë mënyrë“, thuhet ndër të tjera në dëshminë e Lipovicës.
Ai ka deklaruar para prokurorëve se nuk kishte certifikatë sigurie, ndonëse një dokument i tillë është i domosdoshëm për të pasur qasje në “sekrete shtetërore”.
Përveç tij, Lipovica ka bërë të ditur se asnjëri nga zyrtarët e MINT-it, përfshirë edhe ministren Rozeta Hajdari, nuk kishte poseduar certifikatë sigurie.
Në anën tjetër, zyrtari tjetër i akuzuar Hafiz Gara tha para organeve të hetuesisë se zyrtarë të AKI’së në një takim i kishin thënë që certifikata e sigurisë merr kohë dhe se çështja e rezervave shtetërore ishte “urgjente”.
“Lidhur me çështjen e certifikatës se sigurisë, thekson se kishin pasur takim me zyrtarët e AKI-së, ku kishin kërkuar nga ata që të pajisen me certifikatë të sigurisë, mirëpo të njëjtit u kishin thënë se kjo çështje kërkon kohë dhe për shkak se procesi ishte i natyrës urgjente, siç deklaron i pandehuri kishin vepruar mbi bazën e deklaratave të konfidencialitetit“, ka thënë Gara, sipas dosjes.
Megjithatë, bëhet e ditur se të gjithë të përfshiër kishin nënshkruar një deklaratë konfidencialiteti lidhur me pasojat e nxjerrjes së sekretit.
“Sa i përket certifikatës së sigurisë, dëshmitari ka deklaruar se me sa e dinë, certifikatën e sigurisë nuk e posedonte asnjë zyrtarë në ministri. Lidhur me këtë ka theksuar se të njëjtëve u është ofruar nga një deklaratë e konfidencialitetit për nënshkrim të cilën e kishte nënshkruar edhe vet dëshmitari, por edhe për kundër këtij fakti nuk i ishte dhënë qasje në dokumentacion që e kishte kërkuar vazhdimisht me rastin e aprovimit të pagesave“.
Duke u bazuar në rekomandimet e AKI-së që procesi i blerjes së rezervave shtetërore të zhvillohej në mënyrë “sekrete”, ministrja Rozeta Hajdari ka refuzuar të japë deklaratë para prokurorëve specialë.
Më 15 prill 2024, ajo ishte ftuar për t’u marrë në pyetje lidhur me këtë proces, por kishte zgjedhur të mos paraqesë mbrojtje dhe të mos përgjigjet në pyetjet e Prokurorisë.
Hajdari ishte arsyetuar se dokumentacioni që lidhet me rastin është klasifikuar si “sekret” nga Qeveria e Kosovës – vendim që, sipas saj, ndalon publikimin apo diskutimin e detajeve të dosjes.
Edhe gjatë marrjes në pyetje për veprën e dytë penale, atë të “zbulimit të fshehtësisë zyrtare”, ministrja kishte refuzuar të deklarohej, duke përdorur të njëjtin arsyetim.
Megjithatë, sipas Prokurorisë, ky pretendim “nuk prodhon efekt juridik dhe nuk mund të përdoret si mburojë për refuzim të dhënies së deklaratës”, pasi vendimi për klasifikimin e procesit të blerjes së rezervave shtetërore si “sekret” është marrë në kundërshtim me ligjin.
