Aktori i njohur amerikan Giancarlo Esposito, i famshëm për rolin e tij si Gus Fring në serialin “Breaking Bad”, është konvertuar në Islam gjatë qëndrimit të tij në Arabinë Saudite.
Sipas Turki Al-Sheikh, kryetar i Autoritetit të Përgjithshëm për Argëtim në Arabinë Saudite, aktori ka recituar “Shahada”-n, deklaratën islame të besimit, gjatë kohës që po punonte në një projekt filmik në vend, transmeton Indeksonline.
Al-Sheikh ka bërë të ditur se Esposito vendosi të përqafojë Islamin pas përvojës së tij në Arabinë Saudite, ku ka bashkëpunuar me kolegë myslimanë dhe ka qenë pjesë e një ambienti pune ndërkombëtar.
Ai ka shtuar se aktori mori pjesë edhe në falje në një xhami së bashku me ekipin e xhirimeve, ndërsa një video e shpërndarë në rrjetet sociale ka tërhequr vëmendje të madhe.
Sipas tij, vendimi i Espositos është ndikuar nga përvoja pozitive në vend, duke vlerësuar mikpritjen dhe atmosferën që ka gjetur gjatë qëndrimit në Arabinë Saudite.
Ky zhvillim ka ngjallur reagime të shumta në rrjet, duke marrë vëmendjen e fansave të aktorit, i cili njihet si një nga emrat më të suksesshëm të Hollywood-it.
Giancarlo Esposito është bërë i njohur globalisht për rolin e Gus Fring në “Breaking Bad” dhe “Better Call Saul”, si dhe për pjesëmarrjen në projekte të tjera të mëdha si “The Mandalorian”.
Aktualisht, ai ndodhet në Arabinë Saudite për projektin “Seven Dogs”, një nga prodhimet më të mëdha të industrisë së argëtimit në vend, në kuadër të zhvillimit të sektorit të filmit dhe televizionit sipas Vizionit 2030./IndeksOnline/Veriu.info
