Aktorja Gresë Gashi ka ndarë një video në Instagram, ku ka folur për reagimet që, sipas saj, ka marrë në rrjetet sociale pasi nisi të publikojë për Ushtrinë Çlirimtare të Kosovës dhe ish-pjesëtarët e saj që ndodhen në Hagë.
Gashi tha se pas këtyre postimeve ka humbur rreth 10 mijë ndjekës në Instagram.
“Që kur kam fillu me postu për UÇK-në edhe për çlirimtarët që ndodhen padrejtësisht në Hagë, unë i humb rreth 10 mijë followersë”, është shprehur ajo.
Aktorja tregoi se kjo situatë e ka bërë të reflektojë mbi mënyrën se si njerëzit reagojnë ndaj përmbajtjeve që publikohen në rrjetet sociale.
“Mu ka duk një fenomen tepër i çuditshëm se qysh njerëzit kur poston budallakina në përditshmëri t’kqyrin, e kur fol për diçka që ti e ndjen edhe është një temë shumë e ndishme, largohen”, tha Gashi.
Në fund, ajo u shpreh se numri i ndjekësve nuk do ta ndryshojë qëndrimin e saj për të folur publikisht për këtë temë.
“Amo mu numrat në Instagram nuk mujnë me më ndal edhe me ma hup guximin për me fol. Edhe me ditë që edhe 1 mijë followers kanë me më met, unë kam me vazhdu me fol derisa të arrijmë diçka na si popull”, deklaroi ajo.
