Një video e publikuar nga aktivisti i Vetëvendosjes në Pejë, Ardit Gërvalla, ka hapur debat të ashpër publik rreth pasurisë së Kryetarit të Komunës së Pejës, Gazmend Muhaxheri.
Në një paraqitje nga terreni, Gërvalla e akuzon Kryetarin se ka blerë dhjetëra hektarë tokë në disa fshatra të Pejës, duke ngritur pyetje të drejtpërdrejtë: “Ku po i merr paratë për t’i blerë këto toka?”
Ai madje edhe ka publikuar pamje nga parcela që ai pretendon se e bleu Gazmend Muhaxheri, pushtetari i LDK-së në Pejë.
Gërvalla thotë se ndërkohë që qytetarët e Lugut të Baranit vazhdojnë të përballen me mungesë të ujit, Kryetari i Pejës po investon në blerjen e tokave bujqësore. Ai përmend fshatrat Buqan, Poqestë dhe Krushec si zona ku, sipas tij, Muhaxheri ka blerë prona, duke veçuar një parcelë prej rreth 11 hektarësh në Krushec.
“Nuk ka qytetar në Lugun e Baranit që nuk më ka thënë ‘kryetari ka ble tokë’. Këtu prapa meje janë diku 11 hektarë që Kryetari Gazmend Muhaxheri i ka blerë nga një qytetar i fshatit Krushec”, thotë Gërvalla në video.
Ai vë në dyshim burimin e fondeve të Kryetarit, duke pretenduar se vetëm nga paga e tij si zyrtar komunal nuk është e mundur të krijohet një pasuri e tillë. Në të njëjtën kohë, kërkon transparencë publike mbi dokumentacionin e pronësisë:
“Nëse i ke me dokumente të rregullta, edhe ne ta falim. Mirëpo, sa di unë, këtë parcelë nuk e ke në emrin tënd. Prandaj, prezanto dokumentacionin: në emër të kujt është kjo parcelë?”.
Pjesë e videos:
Ardit Gërvalla, aktivist i Vetëvendosjes në Pejë:
“Kryetar Gazmend Muhaxheri, ujin në Lugun e Baranit nuk na e solle, mirëpo tokën po na e blenë. Është mirë, Kryetar Gazmend Muhaxheri, që t’iu tregosh qytetarëve të Pejës, po ashtu edhe qytetarëve të Lugut të Baranit, se ku po i merr paratë për t’i blerë krejt këto toka.
Nuk ka qytetar në Lugun e Baranit që nuk më ka thënë: ‘Kryetari ka ble tokë’.
Ke në fshatin Buqan, në fshatin Poqestë dhe në disa lokacione të tjera – qytetarët po thonë se Kryetari Gazmend Muhaxheri ka blerë tokë.
Këtu prapa meje janë diku 11 hektarë, të cilat Kryetari Gazmend Muhaxheri i ka blerë nga një qytetar i fshatit Krushec. Kryetar, ku po i merr paratë që t’i blesh të gjitha këto toka? Pasi e dimë që vetëm me një pagë është e pamundur të blesh gjithë këtë tokë dhe të krijosh gjithë këtë pasuri.
Nëse i ke me dokumente të rregullta, edhe ne ta falim. Mirëpo, sa di unë, këtë parcelë nuk e ke në emrin tënd. Prandaj, të parashtroj pyetje publike: prezanto dokumentacionin, pasi që ti vetë, me negociata me qytetarë të fshatit Krushec, e ke blerë këtë parcelë.
Pra, në emër të kujt është kjo parcelë?
Kjo është pyetja publike. Por, po ashtu: Ku je duke i marrë paratë për t’i blerë gjithë këto toka dhe gjithë këtë pasuri që e ke krijuar?
Pres përgjigje.”
Mesazhi i Gërvallës, i artikuluar me tone të ashpra akuzuese, ka për qëllim të shtojë presionin publik mbi Kryetarin Muhaxheri për të sqaruar burimet e pasurisë së tij dhe transparencën e pronave.
Gazmend Muhaxheri ende nuk ka dhënë përgjigje publike ndaj këtyre pretendimeve.
Edhe Auditori i Jashtëm ka qenë i ashpër me komunën që drejton Gazmend Muahxeri, duke nxjerr të dhëna e ngritur dyshime për afera në këtë institucion që drejtohet nga pushtetari i LDK-së
Një raport i Insajderit, bazuar në auditimet e jashtme për Komunën e Pejës në tri vitet e fundit, përfshirë vitin 2024, nxjerr një pamje alarmuese të menaxhimit lokal nën udhëheqjen e Muhaxherit.
Aty jepet një tablo e zymtë: Tenderë të zvarritur, pagesa pa punë, subvencione pa kritere dhe asete të paregjistruara. Për tri vite, përfshirë edhe vitin 2024, komuna kaloi përmes një spiraleje të përsëritur keqmenaxhimi financiar, që e ka detyruar ZKA-në të lëshojë opinion të kualifikuar për tri herë radhazi — një paralajmërim serioz për transparencën dhe integritetin e pushtetit lokal. /Insajderi.org/
