Hysen Çekaj i LDK-së, që doli si më i votuar nga votat e diasporës më 9 shkurt të këtij viti, nuk është futur në listën e kësaj partie në zgjedhjet e 28 dhjetorit.
Lumir Abdixhiku ka vendosur që mos ta përfshijë në listën e deputetëve, Hysen Çekajn që mori shumicën e votave të diasporës për LDK-në, fenomen që u cilësua si një inxhinering politik, shkruan Veriu.info.
Madje ishin vet anëtarët e LDK-së që kishin insistuar për orkestrimin e një skeme të organizuar kriminale brenda partisë që drejtohet nga Lumir Abdixhiku.
Në vazhdën e komunikimeve të brendshme të anëtarëve të kryesisë qendrore të LDK-së, më 2 mars 2025, në grupin në “Viber” ku pjesë e tij është edhe kryetari Lumir Abdixhiku, Kujtim Shala dhe bashkëpartiaku i tij Arben Gashi, zhvilluan mes vete një komunikim “goxha të nxehtë”.
Ish-shefi i grupit parlamentar të LDK-së po këmbëngulte se ka pasur vjedhje të votave dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë kriminale”.
“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, shkruante Arben Gashi në grupin në “Viber” të kryesisë qendrore të LDK-së të siguruara nga gazeta Reporteri.
“Asnjë manipulim nuk është i tolerueshëm”, i përgjigjej Kujtim Shala. “Për të gjitha”, vazhdonte numri 2 i listës zgjedhore të LDK-së.
“Kujtim, qitja emrin, nuk është manipulim, është skemë e organizuar kriminale. Pa e identifiku sakt problemin nuk mundemi me e shpëtu partinë”, insistonte Arben Gashi.
Ky i ashtuquajtur inxhiniering i votave, duket se e ka frikësuar Lumir Abdixhikun që të mos e fus në listë Hysen Çekajn që mori numrin më të madh të atyre votave.
Një rënie e numrit të votave për Çekajn në diasporë në këto zgjedhje do të rriste dyshimet e pretendimeve për manipulim të votave në diasporë shkurtin e këtij viti në zgjedhje nacionale.
Pas këtij vendimi edhe vet Çekaj është deklaruar se nuk kandidon për shkaqe familjare.
Se cili do të jetë rezultati i LDK-së në diasporë mbetet të shihet./Veriu.info/
