Menjëherë pas takimit me të parën e vendit, presidenten Vjosa Osmani, ambasadori i Francës në Kosovë, Olivier Guérot, ka njoftuar përmes një postimi në X se në takim është diskutuar situata politike dhe zhvillimet para zgjedhjeve të 28 dhjetorit.
Ai ka theksuar rëndësinë që të gjitha subjektet politike të kenë mundësinë të marrin pjesë në zgjedhje, në mënyrë që procesi të jetë plotësisht gjithëpërfshirës.
Duke pasur parasysh situatën e tensionuar të ditëve të fundit, Guerot tha se mediat e lira dhe puna e gazetarëve janë shtylla kyçe të një demokracie funksionale dhe duhet të respektohen e mbrohen kur është e nevojshme.
Guerot tha se Franca pret që zgjedhjet e 28 dhjetorit të prodhojnë një qeveri të re, me të cilën Parisi synon të thellojë bashkëpunimin dhe të kontribuojë në stabilitetin rajonal.
“Na duhet një partner i plotë për të kontribuar në stabilitetin në rajon dhe për të zhvilluar marrëdhëniet tona dypalëshe”.
Ai gjithashtu informoi se Franca është e gatshme të mbështesë Kosovën në tranzicionin energjetik, përgatitjet për Lojërat Mesdhetare 2030, procesin e anëtarësimit në Organizatën Ndërkombëtare të Frankofonisë, si dhe në zgjerimin e shkëmbimeve ekonomike mes dy vendeve.
