I dërguari i posaçëm i Bashkimit Evropian për dialogun Kosovë-Serbi, Miroslav Lajçak, është duke zhvilluar takimet me Kurtin dhe Osmanin.
Sipas njoftimit nga Brukseli, Lajçaku vjen me qëllimin të vazhdojë diskutimet si pjesë përcjellëse e takimit të nivelit të lartë që ngjau më 27 shkurt në kryeqytetin e BE-së dhe përgatitjeve për mbajtjen e tjetrit më 18 mars në Ohër të Maqedonisë së Veriut.
Presidentja Osmani pas takimit me Lajçakun tha se u diskutua për zhvillimet e fundit në procesin e dialogut me Serbinë.
Osmani ka ritheksuar se Kosova mbetet e angazhuar për një proces, i cili i kontribuon paqes afatgjate, sigurisë dhe prosperitetit të qëndrueshëm në rajon.
Lajcaku takimin e radhës do ta zhvilloj sot edhe me kryeministrin Kurti.
Analistët politik ardhjen e Lajçakut në Kosovë e shohin si vazhdim i bisedimeve rreth planit franko-gjerman.
Gazmir Raci, njohës i çështjeve politike tha se janë momentet e fundit që dy palët të deklarohen për propozimin e BE-së.
Sipas tij, shteti serb nuk është i gatshëm të pranoj planin franko-gjerman.
“Harmonizimi i aneksit për zbatimin e planit franko-gjerman. Këto janë momentet e fundit kur të dyja palët duhet edhe zyrtarisht me u deklaruar me një takim përfundimisht për propozimin e BE-së për zgjedhën e problemit Kosovë-Serbi”.
“Kosova e ka konfirmuar planin e pranit franko-gjerman, jam skeptik që Serbia nuk ka me pranuar diçka të tillë se nuk e gatshme me zbatuar shqyrtimin e Gjykatës Kushtetuese për Asociacionin. Shteti serb nuk është i gatshëm të pranoj kërkesën e Gjykatës”, theksoi Raci për Front Online.
Skeptik se Serbia nuk do ta pranoj planin e propozuar nga BE-ja është edhe analisti Fidan Ukaj.
Ukaj tha për Front Online se Vuçiq nuk do ta nënshkruaj planin franko-gjerman.
“Jam shumë skeptik sa i përket kësaj arritjes së kësaj marrëveshje sepse Serbia ka qenë destruktive në vazhdimësi dhe ky pranim në parim i pjesës së parë ka qenë sa me treguar që Vuçiq dhe Serbia janë të gatshëm për marrëveshje mirëpo kur vie koha për nënshkrim Vuçiq do të tërhiqet dhe Serbia nuk do ta nënshkruaj planin franko-gjerman”, u shpreh Ukaj.
Ai thotë se vizita e Lajçakut sot në vend është funksionalizimi i marrëveshjes mes dy palëve.
“Edhe kjo vizitë e Lajçakut bëhet në vazhdën e takimeve për me e funksionalizuar planin e veprimit të implementimit të marrëveshjes mes palëve, ky është qëllimi i kësaj vizite. Edhe në Serbi që do ta mbajë takimin është një parapërgatitje për takimin e 18 marsit, që palët të jetë të afruara që të bien dakord”, thotë Ukaj.
Lajçaku të hënën dhe të martën e 13 dhe 14 marsit do qëndrojë në Beograd.
