Shqipëria ka hapur kapitullin e parë të negociatave për anëtarësim me Bashkimin Evropian gjatë ditës së sotme.
Kryeministri i Shqipërisë, Edi Rama, në konferencën e përbashkët me ministrin hungarez të Punëve të Jashtme e vlerësoi si historik këtë moment.
“Çelja e kapitujve përbën arritje të madhe dhe shënon gurthemel historik në rrugëtimin e përbashkët. Çdo sukses që Shqipëria në procesin e BE-së duhet të shihet si hap për të gjithë rajonin. Për Shqipërinë nuk ka tjetër të ardhme”, tha Rama.
Profesori i marrëdhënieve ndërkombëtare, Arben Fetoshi, tha se Shqipëria tashmë ka hyrë në fazën më të rëndësishme të integrimit evropian.
Fetoshi në një përgjigje dhënë për “Gazeta Blic” u shpreh ky është një moment i rëndësishëm, jo vetëm për Shqipërinë, sepse efektet e dinamikës së re do të ndjehen në të gjithë rajonin.
Ndërsa sa i përket Kosovës, Fetoshi, tha se për shkak të ngecjes në procesin e dialogut Kosova është në fazën fillestare.
“Me hapjen e kapitujve të parë, Shqipëria, ka hyrë në fazën më të rëndësishme të integrimit europian, kohëzgjatja e të cilës do të varet kryesisht nga përkushtimi për përmbushjen e standardeve. Ky është një moment tejet i rëndësishëm jo vetëm për Shqipërinë, sepse efektet e dinamikës së re do të ndjehen nga të gjithë në rajon. Për shkak të ngecjes së dialogut me Serbinë, Kosova për fat të keq është ende në fazën fillestare, ende nuk e ka marrë statusin e kandidatit, ndonëse janë bërë përparime në përmbushjen e reformës europiane” tha Fetoshi për “Gazeta Blic”.
Profesori, Fetoshi, tha se për Kosovën dhe Serbinë procesi tashmë është i kushtëzuar edhe me zbatimin e Marrëveshjes Bazike dhe Aneksit të Ohrit.
Ai tha se rruga evropiane e të dy shteteve (Kosovë-Serbi) kalon nga normalizimi.
“Për Kosovën dhe Serbinë procesi tashmë është i kushtëzuar edhe me zbatimin e Marrëveshjes Bazike dhe Aneksit të Ohrit, e kjo do të thotë se rruga europiane e të dyjave kalon nga normalizimi. Pra, sa më shpejt që Serbia detyrohet ta pranojë realitetin e ri me Kosovën e pavarur, aq më shpejt do të mund të lëvizim drejt anëtarësimit në BE” tha Fetoshi në përgjigjen e dhënë për “Gazeta Blic”.
Vendimi për hapjen e kapitullit të parë u mirëprit nga presidenti shqiptar, Bajram Begaj, i cili tha se mbush me shpresë shqitarët për realizimin “e ëndrrës së kahershme ‘E duam Shqipërinë si gjithë Evropa’”.
Shqipërinë e ka uruar edhe presidenja e Kosovës, Vjosa Osmani.
Ajo tha se Shqipëria, Kosova dhe vendet e tjera demokratike të rajonit duhet të vazhdojnë të bëjnë përparim në rrugën evropiane “që është thelbësore për të siguruar paqe të qëndrueshme dhe stabilitet, jo vetëm për rajonin, por gjithë Evropën”.
