Hetuesit policorë nga Drejtoria për Hetimin e Trafikimit me Narkotikë-Njësia Prishtinë, po vazhdojnë realizimin me sukses të aksioneve kundër trafikantëve të substancave narkotike.
Në kuadër të Planit Operativ ‘Vera 2026’ mbrëmë kanë arrestuar një person të dyshuar dhe kanë sekuestruar rreth 650 gramë substancë të dyshuar marihuanë.
Burime të Veriu.info bëjnë të ditur se i dyshuari i arrestuar është 19-vjeçari Lendim Gashi.
Veriu.info mëson se rreth orës 19:30 hetuesit e anti-drogës kanë identifikuar një person në një bar kafe në Podujevë, tek i cili kanë gjetur 6 paketime të mbushura me substancë e dyshuar narkotike e llojit marihuanë dhe një peshore digjitale.
Në koordinim me prokuroren Fitore Sadikaj, hetuesit policorë të anti-drogës kanë bastisur shtëpinë e të dyshuarit në Dobërdol të Podujevës, ku kanë gjetur disa qese të mbushura me marihuanë me peshë prej rreth 650 gramë të total.
I dyshuari është intervistuar dhe ndaj tij është iniciuar rasti ‘blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’ dhe me aktvendim nga prokurori kujdestar, i njëjti është dërguar në mbajtje deri në 48 orë.
