Policia e Kosovës kishte planifikuar të furnizohej me uniforma të rregullta policore përmes një tenderi me vlerë të parashikuar prej 2,764,400.00 euro, por procesi është anuluar.
Sipas informacioneve zyrtare, tenderi është ndaluar për shkak të mosrespektimit të procedurave të përcaktuara në Ligjin për Prokurimin Publik.
Bazuar në nenin 26 të këtij ligji, që ka të bëjë me nënshkrimin e kontratave publike, çdo kontratë me vlerë të madhe duhet të nënshkruhet jo vetëm nga zyrtari i prokurimit, por edhe nga Zyrtari Kryesor Administrativ dhe Ministri përkatës, për të qenë e vlefshme. Përjashtim nga kjo rregull bëjnë vetëm Presidenti, Kryetari i Kuvendit dhe Kryeministri.
Në rastin e uniformave, kontrata nuk është nënshkruar në përputhje me këto kërkesa ligjore, duke e bërë atë të pazbatueshme dhe të pamundur për t’u finalizuar.
Ende nuk ka një njoftim zyrtar nëse tenderi do të rihapet, por burime brenda institucioneve kanë bërë të ditur se furnizimi me uniforma mbetet prioritet për Policinë e Kosovës./IndeksOnline/
