Asamblisti i VV-së në Kuvendin Komunal të Ferizajt, Amir Rexhepi, ka ftuar prokurorinë të hetoj konkursin e hapur nga QKMF për mjekë e stomatologë.
Rexhepi thotë se në konkursin për mjek pritet të punësohet Lorika Qbazi, vajza e zëvendësdrejtorit të QKMF-së, Afrim Abazi, e cila ka dalë e para në listë për mjeke pas testit me shkrim, raporton Veriu.info.
Sipas Rexhepi, këto konkurse janë hapur nga qeverisja komunale e Agim Aliu të PDK-së sa për sy e faqe, sepse tashmë dihen emrat që do të pranohen.
Postimi i Amir Rexhepi:
QKMF-ja në Ferizaj ka hapur konkurs publik për rekrutimin e mjekëve dhe stomatologëve. E në vend që ky konkurs të jetë mundësi për profesionistët e vërtetë të fushës, ai është hapur “sa për sy e faqe” dhe është farsë e shëmtuar e fyese për të gjithë ata që ende besojnë në meritë dhe barazi.
Është skandaloze që gjithandej të qarkullojnë emrat e atyre që do të punësohen, anipse konkursi është ende i hapur. Njëri prej tyre që do të punësohen është vetë vajza e zëvendësdrejtorit të QKMF-së. Kjo është fytyra e vërtetë e nepotizmit që po e shkatërron sistemin tonë shëndetësor.
Heshtja e Drejtorit të Shëndetësisë është e turpshme. Ai për fat të keq është kthyer në garantues të pabarazisë e mbrojtës të një procesi të kurdisur.
Kjo skemë është shkatërrim moral ndaj të rinjve që sakrifikojnë vite për t’u arsimuar e në fund të përballen me dyer të mbyllura nga udhëheqësit komunalë që në pozita janë vetëm t’ju shërbejnë familjarëve dhe militantëve partiakë.
🚨Ftoj Prokurorinë që të zhvillojë hetimet e nevojshme dhe të parandalojë shkeljen e të drejtave të qytetarëve si dhe të ndëshkojë shkelësit e përfshirë në këtë skandal.
