Rreth 45 kilometra në veri të Prishtinës, në fshatin Zhitkoc të komunës së Zveçanit, nuk jeton askush sipas të dhënave nga regjistrimi i fundit i popullsisë në Kosovë më 2011.
Por, e vërteta është më ndryshe. Me flamuj të Serbisë para shtëpive, disa anëtarë të dhjetëra familjeve të këtij fshati shprehen të gatshëm të marrin pjesë në regjistrimin e ardhshëm të popullsisë.
Megjithatë, ata fillimisht shfaqen të çuditur kur pyeten për pjesëmarrje në këtë regjistrim, që do të zgjasë nga 5 prilli deri më 17 maj.
“Askush… askush nuk ka ardhur të na informojë. Tani po dëgjoj për herë të parë nga ju”, thotë Spaso Karajliq për Radion Evropa e Lirë.