Policia me AUV-in në Mitrovicë, Pejë e Prishtinë kanë gjetur dhe asgjësuar rreth 2000 kg mish me afat të skaduar
Drejtoria për Hetimin e Krimeve Ekonomike dhe Korrupsionit (DHKEK), konkretisht Njësia Rajonale Prishtinë, përmes rrugëve operative ka pranuar “Informatë” mbi dyshimin që disa nga prodhuesit e produkteve të mishit, janë duke abuzuar me produktet me afat të skaduar, duke filluar nga shitja e tyre me çmim më të lirë, e deri tek ri-përpunimi i tyre dhe ofrimi për konsum tek qytetarët, raporton Veriu.info
Veriu.info mëson se ky aksion është zhvilluar nga tri grupe të ndara, ku ekipet kanë inspektuar dy lokacione në regjionin e Mitrovicës, dy të tjera në regjionin e Prishtinës dhe një lokacion në regjionin e Pejës.
Siç mëson Veriu.info, në regjionin e Pejës është kontrolluar fabrika e përpunimit të mishit “Buçuku”, ku në të janë gjetur 1,550 kg mish dhe produkte të ndryshme mishi, të futura në ngrirje të thellë në qese plastike, e të cilat nuk ka pasur kurrfarë deklaracioni mbi origjinën dhe datën e skandecës. Ato menjëherë janë konfiskuar dhe asgjësuar në deponinë e mbeturinave.
“Më datën 20.10.2023 në konsultim me Prokurorinë Themelore, është realizuar Plani Operativ në bashkëpunim me Inspektoratin e AUV-it me ç’ rast janë kontrolluar disa kompani, në tri lokacione të ndryshme (Prishtinë, Pejë dhe Mitrovicë), ku është bërë kontrollimi i gjithmbarshëm i mallrave/produkteve dhe dokumentacionit përcjellës.
Në lokacionet e inspektuara/kontrolluara, janë gjetur rreth 2000 kg (dymijë kg) mish dhe produkte të mishit me afat të skaduar, ku një pjesë është asgjësuar ndërsa një pjese iu janë marr mostrat për dërgim në laborator. Pas inspektimit të lokacioneve, është përpiluar procesverbal mbi ecurinë e operacionit, ndërsa është iniciuar rasti “Prodhimi dhe vënia në qarkullim e artikujve të dëmshëm ushqimorë”, ku nga njësitet e DHKEK-së janë duke vazhduar veprimet operativo-hetimore.
Policia e Kosovës bën të ditur se mbetet e përkushtuar në luftimin e të gjitha dukurive negative, dhe sjelljen para drejtësisë të të gjithë personave përgjegjës pavarësisht funksionit që ata kryejnë./Veriu.info
