Agjencia e Ushqimit dhe Veterinarisë ka njoftuar se ka ndaluar në kufi hyrjen në Kosovë të mbi 1 mijë kilogramë patatina STIZA Paprika për shkak të rrezikut të lartë të akrilamidit.
Bëhet e ditur se kjo sasi e patatinave me nivel të lartë të akrilamidit ka qenë duke u importuar në Kosovë nga kompania e Prizrenit BEST BT SH.P.K., ku siç mëson Veriu.info, pronar i kësaj kompanie është biznesmeni Besim Tarashaj.
Akrilamidi është një substancë kimike që formohet natyrshëm në disa ushqime gjatë përpunimit në temperatura të larta, veçanërisht gjatë skuqjes, pjekjes dhe fërgimit.
Ndryshe, niveli i lartë i akrilamidit në patatina paraqet rrezik potencial për shëndetin e njeriut, veçanërisht në rastet e ekspozimit të përsëritur dhe afatgjatë. Sipas vlerësimeve shkencore, kjo substancë ka potencial kancerogjen dhe gjenotoksik, pasi mund të shkaktojë dëmtime të ADN-së. Ekspozimi ndaj niveleve të larta të akrilamidit lidhet gjithashtu me efekte të dëmshme në sistemin nervor dhe në zhvillimin e organizmit, raporton Veriu.info.
Patatinat STIZA prodhohen në Maqedoninë e Veriut, nga kompania Prehrambena Industrija STIZA DOOEL, me seli në Manastir.
Komunikata e AUV:
AUV ndalon hyrjen e 1,068 kg patatinave STIZA Paprika për shkak të nivelit të lartë të akrilamidit
Agjencia e Ushqimit dhe Veterinarisë (AUV), gjatë kontrolleve zyrtare në kufi, ka ndaluar hyrjen në Republikën e Kosovës të 1,068 kg patatina “STIZA Potato Chips Paprika”, LOT 909073, të importuara nga kompania BEST BT SH.P.K., Prizren, për shkak të konstatimit të nivelit të akrilamidit mbi vlerat referente të përdorura gjatë kontrollit laboratorik.
Bazuar në rezultatet e analizave laboratorike, sipas raportit nr. 4397/2026, Inspektorati Fitosanitar Kufitar i AUV-së, më 23 tetor 2026, ka marrë vendim për ndalimin e hyrjes dhe kthimin e ngarkesës, duke parandaluar vendosjen e saj në tregun e Kosovës.
Akrilamidi është substancë kimike që mund të formohet gjatë përpunimit të ushqimeve të pasura me niseshte në temperatura të larta, veçanërisht gjatë skuqjes dhe pjekjes. Sipas Autoritetit Evropian për Sigurinë Ushqimore (EFSA), ekspozimi afatgjatë ndaj akrilamidit përmes ushqimit përbën shqetësim për shëndetin publik për shkak të potencialit të tij kancerogjen.
AUV thekson se masa e ndërmarrë i referohet ngarkesës së identifikuar me LOT 909073 dhe vazhdon kontrollet zyrtare për të parandaluar hyrjen në treg të produkteve që nuk përmbushin kërkesat e sigurisë ushqimore, me qëllim mbrojtjen e shëndetit të konsumatorëve.
