Që nga dje, veriu i Kosovës është bërë temë e mediave. Madje, për tensionet në atë pjesë të vendit, kanë shkruar edhe gazetat e njohura ndërkombëtare. Ndërsa, situate është qetësuar tashmë, dhe barrikadat po largohen, kryeministri Albin Kurti ka njoftuar se Policia e Prokuroria po hetojnë sulmet që ndodhën mbrëmë.
Ndërsa, vendosja e reciprocitetit për targa dhe dokumente me Serbinë, është shtyer për 30 ditë, pas kërkesës së Ambasadës Amerikane ndaj institucioneve të Kosovës.
Çka mendojnë qytetarët?
Veriu si gjithmonë ngjallë shumë reagime në gjirin e shoqërisë kosovare.
Gazeta Nacionale ka intervistuar disa qytetarë në sheshin “Nënë Tereza” e “Zahir Pajaziti”, për të kuptuar qëndrimin e tyre rreth tensioneve në veri.
Ajo çfarë u pa nga intervistat e shumta që Nacionale i realizoi, ishte përkrahje pothuajse unanime ndaj vendimit të Qeverisë Kurti për reciprocitet me Serbinë.
Bedri Sadiku, qytetar nga Prishtina, e vlerësoi si vendim të duhur reciprocitetin me Serbinë.
“Me të tregu drejtën është një vendim i mirë i Qeverisë në lidhje me veri. Absolutisht pse e protestojnë këtë punë serbët, kur ne dojmë veç reciprocitet. Në këtë aspekt, besoj që kemi me ja arrit qëllimin”, tha ai.
Tutje, Sadiku tha se shtyrja për 30 ditë e zbatimit të reciprocitetit duket të jetë bërë nga frika e eskalimit të situatës në veri.
“Ndoshta mundet me qenë i ngutshëm. Absolutisht pajtohem që janë friku prej eskalimit të situatës. Në këtë aspekt, besoj që kemi me arrit një marrëveshje. Gjithsesi besoj që duhet të ketë reciprocitet”, theksoi Sadiku.
Ndërsa një qytetar tjetër, e theksoi nevojën e koordinimit me Shtetet e Bashkuara të Amerikës për çështjen e reciprocitetit.
“Ajo ka veprue mirë, por pa e pyet Amerikën, kurgjo. Amerika na ka çliru, atë duhet me vet gjithë. Pasi e pyetën Amerikën, e shtynë 30 ditë. Nashta ma mirë se nashta bëjmë diçka. Prej asaj nuk pritet, se ajo s’kshyrë me ndreq diçka, me dialog”, tha Shemsi Murseli për Nacionale.
Ndërsa, Ali Musliu, u pa shumë i entuziazmuar pas vendimit.
“Vendim shumë i mirë. Avavav, kurrë më mirë. Sundimi i ligjit duhet me kanë në tanë Kosovën. Gjithqysh duhet me pasë reciprocitet. E përgëzoj Albin Kurtin, veç përpara se shumë mirë është t’u vepru”, tha rrufeshëm Musliu.
Sikruse Murseli, edhe Musliu e sheh të nevojshme konsultimin me amerikanët.
“Mirë është, mirë është masi u marrë vesh me Amerikën. Çka të thotë Amerika, duhet me bo edhe na. Amerika na ka ndihmu gjithëherë, edhe kurrë s’na le në lloq”, përfundoi Musliu.
Ndërsa, Qazim Sylejmani shkurtimisht theksoi se “vendimi është i mirë. Por s’e kemi nijet me u rehatu”.
Por, kishte edhe qytetarë, ndonëse shumë rrallë, që theksonin se vendimi nuk është i mirë.
“Për besë mirë nuk është hiç. Por, po më duket që edhe këta tonët po lëshojnë pak pe, se nuk duhet me lëshu pe kurrsesi ndaj serbëve, sepse e kanë tepru”, tha Nezir Gashi.
Por, çfarë tha Kurti?
Një ditë pas tensioneve në veri, kryeministri Albin Kurti, së bashku me ministrin e Brendshëm, Xhelal Sveçla, kanë mbajtur një konferencë për media. Aty i pari i ekzekutivit e vartësi i tij, shpjeguan situatën aktuale në veri të vendit dhe atë çfarë ndodhi që nga dje.
Në këtë konferencë për media, Kurti e Sveçla treguan për sulmet ndaj qytetarëve në veri, bllokimin e pikave kufitare, e dialogun me Serbinë pas tensioneve, ndër të tjera.
I pari i ekzekutivit, në fillim të konferencën, u shprehi mirënjohje policëve për angazhimin në veri të vendit.
Kurti informoi se pikat kufitare vazhdojnë të mbesin të bllokuara.
“Shpreh mirënjohje të thellë ndaj policisë së Kosovë që janë në veri të Ibrit, duke vepruar me profesionalizëm të lartë. Pikat kufitare Jarinje dhe Bërnjak, ende mbeten të mbyllura”, shtoi Kurti.
Gjatë paraqitjes së tij, Kurti theksoi se strukturat ilegale të Serbisë janë kriminale e agresive si rrallë më parë.
“Mbrëmë ka pasur të shtëna në drejtim të Policisë së Kosovës dhe 9 barrikada me njerëz të armatosur të cilët kanë ndaluar qytetarët në automjete e ata këmbësorë. Strukturat ilegale të Serbisë janë bërë banda kriminale, agresive si rrallë më parë. Nuk është e lehtë për shtetin tonë sepse ato i mbështet i gjithë aparati shtetëror i fqinjit tonë verior”, tha Kurti.
Shefi i Qeverisë tha se me rastet kriminale në veri po merren policia e prokuroria.
“Janë me dhjetëra shkelje të rënda dhe të qarta të ligjit të bëra dje e me të cilat po merren Policia dhe Prokuroria. Fatmirësisht nuk ka të plagosur me armë zjarri”, theksoi ai.
Kryeministri deklaroi se nuk ka ndonjë ftesë ende nga Joseph Borrell, shef i diplomacisë së BE-së, për takimin me presidentin e Serbisë, Aleksandër Vuçiq, në Bruksel.
