Analisti e publicisti Baton Haxhiu ka parashikuar një rënie të Lëvizjes Vetëvendosje në zgjedhjet e 28 dhjetorit.
Në emisionin Pressing të mërkurën në mbrëmje, Haxhiu tregoi kalkulimet e tij për rezultatin e mundshëm të VV-së.
Sipas tij, partia e udhëhequr nga Albin Kurti ka humbur tre deri në katër për qind të votuesve rezident.
Ai tha se VV-ja do të mundohet ta “mbulojë” rënien e votuesve të tyre rezident me votat e diasporës, por që sipas Haxhiut matematikisht një gjë e tillë nuk është e mundur.
“Po flasim për një rënie të brendshme të Lëvizjes Vetëvendosje ose thënë më mirë rënie të votuesve rezident gati 3 deri në 4 për qind dhe krejt shpresat janë që kjo përqindje të rikthehet me diasporën dhe që VV të arrijë përsëri në 41 për qind. Por, shifrat tregojnë ndryshe”, ka thënë Haxhiu.
“Të gjitha hyrjet e diasporës prej 15 dhjetor kapin shifrën prej 260 deri në 310 mijë në çdo vit dhe 35 për qind prej tyre janë fëmijë dhe mbesin diku rreth 160 mijë votues. Një pjesë e tyre që i kanë mbushur 18-vjeç nuk kanë interesim të fortë dhe votues potencial të diasporës janë dikur prej 90 deri në 110 mijë. Me një logjikë analitike në bazë të këtyre kalkulimeve ekziston mundësia që VV mundet me arrit shifrën prej 38.3 deri në 39,5 për qind”, tha Haxhiu në Pressing.
Megjithatë, autori i EXIT-POLL-eve ndër vite, Haxhiu potencoi se me votat e diasporës me postë Lëvizja Vetëvendosje mund të arrijë përsëri mbi 40 për qind.
Sipas Haxhiut maksimumi i rezultatit që mund të arrijë Vetëvendosje është 41 për qind.
“Mos t’harrojmë që i kemi edhe 40 mijë vota të cilat vijnë me postë. Edhe ato të diasporës me postë, VV del në 35 për qind prej tyre. Opsioni maksimal i VV-së mund të arrijë në 41 për qind. Mirëpo, versioni që është i kalkuluar është 61 për qind për partitë opozitare dhe 39 për qind për Vetëvendosjen”, përfundoi Haxhiu.
