Këngëtarja shqiptare me famë ndërkombëtare, Bebe Rexha, ka dalë në mbështetje të studentëve shqiptarë në Maqedoninë e Veriut, të cilët kanë paralajmëruar protestë për të drejtën e përdorimit të gjuhës shqipe në provimin e Jurisprudencës.
Përmes një postimi në rrjetet sociale, ajo ka deklaruar se gjuha shqipe është thellësisht e rrënjosur në identitetin kombëtar të shqiptarëve dhe se breza të tërë kanë luftuar për ta ruajtur dhe mbajtur gjallë atë.
“Gjuha jonë shqipe është thellësisht e rrënjosur në identitetin tonë. Për breza me radhë kemi luftuar për ta ruajtur dhe mbajtur gjallë”, ka shkruar ajo, transmeton albinfo.ch.
Tutje, Bebe Rexha u shpreh se Maqedonia e Veriut është shtet multietnik, i ndërtuar mbi bashkëjetesën dhe të drejtat e barabarta për të gjitha komunitetet, ku gjuha shqipe njihet si gjuhë bashkëzyrtare.
“Studentët shqiptarë meritojnë të njëjtat të drejta dhe mundësi si të gjithë të tjerët”, tha ajo.
