Presidenti i Shqipërisë Bajram Begaj në fjalën e tij me rastin e 145 vjetorit të Lidhjes së Prizrenit ka thënë se kombi shqiptar duhet të mbështetet te partnerët e vet strategjik.
Begaj, i cili është zyrtari më i lartë i Shqipërisë që ka ardhur në Prizren për këtë ngjarje, para Presidentes Vjosa Osmani e Kryeministrit Albin Kurti, ka folur për luftimin e përçarjeve dhe unitet politik.
“Jemi me fat që të parët tanë, përveç gjuhës e kulturës na kanë trashëguar edhe miqësitë e vjetra e partnerë strategjikë të besueshëm, tek të cilët mund dhe duhet të mbështetemi kurdoherë. Jo çdo gjë ka qenë e lehtë por e ardhmja e kombit tonë do të jetë gjithnjë e më e begatë nëse ne luftojmë ndasitë dhe përçarjet mes vetes tonë, mes njëri tjetrit, nëse ne ruajmë boshtin tonë moral, nëse nuk harrojmë të shkuarën nëse e përçojmë te brezi i ri vlerat e atdhedashurisë dhe miqësisë, vlerat e paqes dhe unitetit”, ka theksuar Begaj.
Deklarimi i tij vjen në një kohë kur marrëdhëniet mes Kosovës dhe Shteteve të Bashkuara të Amerikës e Bashkimit Evropian nuk kanë qenë kurrë më të brishta dhe të ftohta. Shkak veprimet e Qeverisë në krye me Albin Kurtin në Veri.
Ky pa u koordinuar me asnjërën palë çoi me asistimin e Policisë nëpër objektet qendrore komunale kryetarët e zgjedhur shqiptarë në Zveçan, Zubin Potok, Leposaviq e Mitrovicë të Veriut, komuna të banuara me shumicë serbe.
