Behgjet Pacolli qëndroi për katër orë në Prokurorinë e Tiranës ku u mor në pyetje për mosmarrëveshjet në lidhje me aksionerët e tjerë në projektin e aeroportit të Vlorës.
Biznesmeni nga Kosova, pronar i kompanisë ‘Mabco Constructions’ nuk dha detaje nga hetimi, por gazetarëve që e prisnin në dalje të prokurorisë iu përgjigj duke thënë se “aeoroporti do të bëhet”.
“Unë isha këtu për të dhënë dëshmi për përgjigjen penale që ne kemi parashtruar dhe si person i informuar më duket se është e drejtë që të shkojë dhe të tregojë kronologjinë e çështjes”, tha Pacolli.
“Isha për kallëzimin që vëllai im ka bërë ndaj personave… ju e dini ndaj kujt. Dhe, unë isha për të informuar për këtë takim. Këtu s’ka të bëjë asgjë qeveria”, u shpreh ai.
Pacolli tha se i beson drejtësisë.
“Unë besoj shumë në drejtësi dhe do të veprojë ashtu si do të pasojë vendimet gjyqësore”, u shpreh biznesmeni.
Pacolli është marrë në pyetje në të njëjtën ditë që zëvendëskryeministrja Belinda Balluku thirret në SPAK për një çështje tjetër, në lidhje me mbikqyrjen e punimeve në Tunelin e Llogarasë.
