Para qeverisë së re serbe tani janë tri çështje kyçe – normalizimin e marrëdhënieve me Kosovën, reformat dhe harmonizimin e politikës së jashtme me BE-në, ka thënë Vladimir Bilcik, raportuesi i Parlamentit Evropian për Serbinë.
I pyetur se çfarë pret nga Qeveria e re e Serbisë, e cila do të formohet pas zgjedhjeve, Bilcik ka thënë se janë tre gjëra që janë theksuar deri më tani.
“Gjëja e parë është një përkushtim i sinqertë për normalizimin e marrëdhënieve ndërmjet Serbisë dhe Kosovës. E di që deri më tani janë bërë disa punë konstruktive pavarësisht tensioneve”, ka thënë Bilcik.
“Shpresoj se qeveria e ardhshme do të bëjë vërtet përparim në drejtim të normalizimit të marrëdhënieve me Kosovën, që përfshin zgjidhjen e çështjeve të hapura, që i referohet edhe sulmit në Banjskë në shtator. Kjo çështje nuk do të zhduket”, e ka bërë të qartë Bilcik, transmeton Paparaci.
Si pikë të dytë, ai përmendi domosdoshmërinë e zbatimit të reformave.
“Reforma, reforma, reforma. Shpresoj që qeveria e re, shumica e re qeverisëse, të përmbushë mandatin e saj katërvjeçar, të jetë e qëndrueshme dhe të jetë në gjendje të fokusohet në gjithçka që duhet bërë në fushën e shtetit ligjor, demokracisë, por edhe reformave strukturore në ekonomi, energjetikë. Të gjitha këto së bashku mund ta afrojnë Serbinë drejt anëtarësimit në BE”, tha ai.
Zgjerimi, sipas fjalëve të tij, është rikthyer në agjendën e Bashkimit Evropian, prandaj shpreson dhe dëshiron që kjo temë të kthehet në agjendën e Serbisë me qeverinë e re.
Si gjë e tretë të rëndësishme, ai përmendi përafrimin e politikës së jashtme të Serbisë me BE-në.
“Unë e kuptoj që ka disa çështje, e kuptoj që është e vështirë, por derisa Serbia përparon drejt normalizimit të marrëdhënieve me Kosovën, shpresoj se do të ketë harmonizim me politikën e jashtme të Bashkimit Evropian, duke përfshirë edhe sanksionet kundër Rusisë. Në kohën kur Rusia sulmoi Ukrainën, integritetin e saj territorial, them se Serbia duhet të qëndrojë pranë nesh për këtë çështje”, ka thënë Bilcik.
Ky do të jetë gjithashtu një sinjal për të gjithë partnerët në BE, ka shtuar ai.
