Zyrtarë të lartë amerikanë janë duke u përgatitur për mundësinë e një sulmi ndaj Iranit ditëve në vijim, sipas disa personave të afërt me çështjen, shenjë se Uashingtoni është duke e përgatitur infrastrukturën për të hyrë drejtpërdrejt në një konflikt me Teheranin.
Situata është ende duke evoluuar dhe mund të ndryshojë, thanë këta persona, të cilët kërkuan të mbeteshin anonimë për të folur rreth bisedimeve private. Disa prej tyre i përmendën planet e mundshme për një sulm në fundjavë. Udhëheqës të lartë në disa agjenci federale gjithashtu kanë filluar që të bëhen gati për një sulm, tha njëri nga personat, raporton mediumi “Bloomberg”.
Presidenti amerikan, Donald Trump, për disa ditë e ka përmendur sulmin e tillë ndaj Iranit, i cili është përfshirë në luftime me Izraelin për gati një javë.
Trumpi u tha gazetarëve në Shtëpinë e Bardhë të mërkurën se ai ka “ide për atë se çfarë të bëhet” dhe se parapëlqen që ta marrë “vendimin përfundimtar një sekondë para afatit”, sepse situata në Lindjen e Mesme është e ndryshueshme.
Disa orë më herët, Trumpi tha: “Unë mund ta bëj këtë, mund të mos e bëj”, kur u pyet nëse po i afrohej vendimit për ta sulmuar Iranin.
Një zyrtar i Shtëpisë së Bardhë tha se të gjitha opsionet mbeten në tavolinë, transmeton gazeta “Nacionale”.
Pozicioni i hapur i presidentit ndaj një lufte është ndryshim nga komentet e tij të mëhershme të para një jave, kur ai bënte thirrje për bisedime diplomatike për të arritur një marrëveshje bërthamore me Iranin.
Pritja për disa ditë para sulmit u jep udhëheqësve iranianë kohë shtesë për të dëshmuar para Trumpit se janë të gatshëm që të heqin dorë nga një pjesë e kapaciteteve për pasurimin e uraniumit me qëllim të parandalimit të sulmit nga ShBA-ja, thekson mediumi “Bloomberg”.
Ministri i Jashtëm i Iranit, Abbas Araghchi, tha në një postim në rrjete sociale më herët të mërkurën se vendi i tij mbetet “i përkushtuar ndaj diplomacisë” dhe kurrë nuk ka kërkuar e as nuk do të kërkojë armë bërthamore.
Ministrat e Jashtëm të Britanisë, Francës dhe Gjermanisë po planifikojnë që të zhvillojnë bisedime bërthamore me homologun e tyre iranian të premten në Gjenevë, sipas një personi të afërt me çështjen. Për këto bisedime ka raportuar edhe agjencia e lajmeve “Reuters”.
Trumpi me vite ka bërë thirrje që Shtetet e Bashkuara të qëndrojnë larg konflikteve të huaja dhe ka bërë fushatë me premtimin se do të parandalonte një luftë tjetër botërore e do të përqendrohej në çështje të brendshme.
Që nga fillimi i sulmeve të Izraelit, Irani ka hedhur 400 raketa balistike e qindra dronë drejt Izraelit, duke vrarë 24 njerëz e duke lënduar mbi 800 të tjerë, sipas Qeverisë së Izraelit. Të paktën 224 iranianë janë vrarë nga sulmet izraelite.
