Instituti Albanologjik ka botuar librin shkencor të Dr. Hysen Matoshit, veprën studimore,” Veprimtaria studimore e Bajram Krasniqit”.
Bëhet fjalë për një vepër monografike e munguar deri tani për kontributin shkencor të dr. Bajram Krasniqit, për problemet dhe çështjet letrare në tërësi, romanin dhe romanin historik në veçanti.
Ky libër është një studim monografik shkencor për veprat studimore të Bajram Krasniqit, njërit prej njohësve dhe studiuesve më të mirë që kishte letërsia shqipe.
Me një trajtim analitik dhe të vëmendshëm në planin akademik janë interpretuar veprat e kritikut dhe studiuesit tonë të njohur, i cili në të gjallë të tij ishte pjesë e Institutit Albanologjik-Prishtinë, gjegjësisht Degës së Letërsisë-IAP.
Recensentë të këtij libri studimor të dr. Hysen Matoshit janë Fadil Grajçevci dhe Adil Olluri, redaktor gjuhësor është Rinor Matoshi, ndërsa redakturën kompjuterike e ka bërë Endrit Aliu.
Dr. Hysen Matoshi është këshilltar shkencor në Institutin Albanologjik-Prishtinë, gjegjësisht Degën e Letërsisë-IAP.
Edhe pse jetëshkurtër, vepra e tij shkencore, intelektuale e kulturore vazhdon të vlerësohet lartë nga studjuesit e letërsisë shqiptare. Krijimtaria e tij, penda e tij e mprehtë, i reziston kohës dhe harrimit. Ajo ngërthen kërkime dhe analiza të larmishme teorike, historiko-letrare, këndvështrime kulturore, sociologjike e politike të kohës, e në veçanti studime të thella konkrete, sidomos analiza e shquar e tij e romanit historik shqiptar ku më së miri shkëlqen shëmbëlltyra e tij krijuese e letrare.
Për Bajramin kanë shkruar studiues dhe intelektualë të shumtë nga të gjitha viset shqiptare. Për gjurmët e tij të thella në historikun e kritikës letrare shqipe, studjuesi i shquar nga Tirana, Jorgo Bulo, shkruante: “Vdekja e Bajramit është një humbje për shkencën tonë letrare dhe për kulturën e kombit tonë, së cilës i kushtoi talentin e tij të rrallë, pasionin dhe frymëzimin e shkencëtarit që e pat lidhur me jetën e vetë, me fatin e popullit dhe kulturës së tij.
