Sipas tij, presidentja ka disa kritere mbizotëruese që duhet t’i marrë parasysh gjatë konsultimeve për formimin e qeverisë në rundin tjetër.
“Unë ende nuk jam i sigurt që presidentja ua ka dhënë të drejtën atyre që ta propozojnë përsëri mandatarin, sepse jemi në një fazë ku është në dorën dhe diskrecionin e presidentes të vlerësojë se kujt i jepet mandati herën tjetër, ose kush caktohet kandidat për formimin e qeverisë së re. Nëse presidentja vendos që t’ia japë të drejtën e ripropozimit LVV-së, ajo duhet të ketë kujdes se çfarë propozimi po i vjen nga kjo parti. Nëse është kandidati i njëjtë, nuk duhet ta pranojë, sepse edhe Gjykata Kushtetuese e ka përcaktuar qartë se, në rastin kur mandatari i parë dështon, është në diskrecionin e presidentes të vlerësojë se cila parti ka gjasa të formojë shumicën dhe ta dërgojë mandatarin në Kuvend. Por kandidati që është konsumuar një herë, që është votuar dhe ka dështuar ta formojë shumicën, nuk është më i denjë, sepse deputetët e Kuvendit e kanë refuzuar dhe nuk i kanë dhënë besimin. Për presidenten, kjo çështje është fakt i kryer”, ka deklaruar Bugaqku.
Ai ka shtuar se Lëvizja Vetëvendosje, si parti politike, mund ta ripropozojë Albin Kurtin për kryeministër, por presidentja nuk duhet ta pranojë nëse bëhet fjalë për të njëjtin kandidat.
“Lëvizja Vetëvendosje, si parti politike, mund ta ripropozojë Albin Kurtin për kryeministër, por presidentja e shtetit nuk duhet ta mandatojë herën tjetër nëse ai i vjen si propozim. Nëse presidentja vendos t’ua japë LVV-së të drejtën e ripropozimit të kandidatit për kryeministër, ajo duhet të ketë kujdes për natyrën e propozimit që i vjen nga kjo parti. Nëse bëhet fjalë për të njëjtin kandidat, presidentja nuk duhet ta pranojë”, ka përfunduar ai.
