Në një shkresë zyrtare të siguruar nga Gazeta Insajderi, Ministri i Kulturës, Rinisë dhe Sportit, Hajrulla Çeku, i është drejtuar krerëve të lartë të UEFA-s dhe FIFA-s me një “Njoftim Shqetësimi”. Ai denoncon dështimin e Federatës së Futbollit të Kosovës për të përmbushur kriteret ligjore dhe tentativën për të mbajtur një proces zgjedhor të manipuluar e antidemokratik.
Gazeta Insajderi ka siguruar dokumentin e plotë ku Ministri Hajrulla Çeku u drejtohet Sekretarit të Përgjithshëm të UEFA-s, Theodore Theodoridis dhe atij të FIFA-s, Mattias Grafström.
Në këtë letër, MCYS shpreh shqetësim të thellë për situatën në FFK, duke theksuar se federata ka injoruar marrëveshjet për harmonizimin e statutit dhe po shkon drejt zgjedhjeve të planifikuara për 5 shkurt 2025, pa plotësuar kushtet ligjore.
Pika më kritike e denoncimit të Çekut lidhet me standardet demokratike të kandidaturës për President të FFK-së. Sipas shkresës, FFK ka vendosur një “kurth” statutar: Federata ka rreth 40 anëtarë në total, por vetëm rreth 26 janë të licencuar dhe kanë të drejtë vote, për të kandiduar për President, kërkohen 15 nënshkrime mbështetëse.
Ministri Çeku potencon se ky raport matematikisht pamundëson garën: “Në praktikë, kjo dispozitë rezulton në lejimin de facto të vetëm një kandidateje, duke eliminuar konkurrencën dhe duke minuar parimet themelore të zgjedhjeve demokratike”.
Sipas dokumentit, kjo kërkesë ishte udhëzuar të hiqej nga grupet punuese të UEFA/FIFA, por FFK e ka mbajtur në versionin final të Nenit 32.
Në shkresë, Ministria akuzon FFK-në për dezinformim. Derisa FFK pretendon publikisht se “nuk ka më kërkesa nga UEFA dhe FIFA” dhe se çështjet janë mbyllur në vitin 2025, MCYS e demanton këtë, duke thënë se pretendimet e federatës janë të pasakta dhe se harmonizimi statutar nuk ka ndodhur kurrë.
Sipas ministrit, FFK nuk ka zbatuar ndryshimet statutore brenda afatit 6-mujor të rënë dakord që nga viti 2023, procesi i licencimit nuk ka përfunduar për 7 shoqata rajonale dhe disa klube profesionale, kusht ky i vendosur nga MKRS.
Ministri pyet drejtpërdrejt UEFA-n dhe FIFA-n nëse ky mekanizëm i “nënshkrimeve bllokuese” është në harmoni me parimet e qeverisjes së mirë dhe mosdiskriminimit.
Ministri Çeku ka kërkuar zyrtarisht nga UEFA dhe FIFA që të ndërhyjnë për të sqaruar këto pika dhe ka kërkuar që: FFK të diskutojë dhe harmonizojë urgjentisht vërejtjet e lartpërmendura, të zgjidhet çështja e licencimit të shoqatave rajonale si dhe asambleja Zgjedhore të mos konvokohet pa u verifikuar përputhshmëria ligjore.
“MKRS ka obligim ligjor të kërkojë nga federatat harmonizimin e akteve të tyre me ligjin… ky veprim nuk është ndërhyrje në autonomi, por mbrojtje e ligjshmërisë dhe integritetit institucional,” thuhet në shkresë.
