Autoritetet e Kosovës kanë intensifikuar përpjekjet për lirimin e ish-pjesëtarit të Njësisë Speciale të Policisë së Kosovës, Arbnor Spahiu, i cili është arrestuar në Serbi dhe po mbahet në paraburgim nën akuzën për “vrasje të rëndë” në fshatin Banjskë të Zveçanit.
Spahiu, i cili u ndalua më 7 qershor në kufirin ndërmjet Hungarisë dhe Serbisë, ndërsa ishte në udhëtim me autobus nga Austria për në Kosovë, akuzohet nga autoritetet serbe për një ngjarje të ndodhur në shtator të vitit 2023, kur një grup serbësh të armatosur sulmuan policinë e Kosovës, duke vrarë rreshterin Afrim Bunjaku.
Gjykata e Lartë në Suboticë ka vendosur një muaj paraburgim për Spahiun, i cili akuzohet për veprën penale të “vrasjes së rëndë” në Banjskë.
Sidoqoftë, autoritetet kosovare kanë reaguar duke e cilësuar këtë akuzë si të pabazuar dhe të fabrikuar, duke theksuar se Spahiu ka dhënë dorëheqje nga Policia e Kosovës që nga viti 2022 dhe ka jetuar me familjen e tij në Gjermani.
Kryeministri i Kosovës në detyrë, Albin Kurti, theksoi në një postim në Facebook se institucionet e Kosovës janë angazhuar fuqishëm për lirimin e Spahiut. Ai deklaroi se “sjellja jonormale e Serbisë ndaj qytetarëve të Republikës së Kosovës nuk duhet dhe nuk do të pranojmë të normalizohet.”
Nga ana tjetër, presidentja e Kosovës, Vjosa Osmani, kërkoi që Serbia të ndalojë ndalimet politike ndaj qytetarëve të Kosovës, duke i quajtur veprimet e saj arbitrare dhe duke theksuar se këto do të pengojnë çdo mundësi për dialog dhe normalizim të marrëdhënieve mes dy vendeve.
Osmani theksoi në Facebook se “këto shkelje të të drejtave të njeriut nga ana e Serbisë nuk mund të injorohen dhe kërkoi reagim të fuqishëm nga shtetet e QUINT-it dhe Misioni i BE-së.”
Ministria e Punëve të Jashtme dhe Diasporës e Kosovës ka theksuar se po i ndjek me vëmendje zhvillimet për arrestimin e Spahiut dhe ka informuar vendet e QUINT-it për rastin. Ajo gjithashtu ka bërë të ditur se janë bërë përpjekje për të siguruar një vizitë për Spahiun nga Ambasadori i Kosovës në Serbi, Jetish Jashari, në Qendrën e Paraburgimit në Suboticë.
“Kosova do të vazhdojë të shfrytëzojë të gjitha kanalet diplomatike për të siguruar që kjo padrejtësi ndaj një shtetasi të Kosovës të marrë fund,” ka deklaruar Ministria e Punëve të Jashtme dhe Diasporës.
Po ashtu, Drejtori i Policisë së Kosovës, Gazmend Hoxha, bëri të ditur se janë dorëzuar dokumente zyrtare që vërtetojnë se Spahiu nuk ka qenë pjesë e Policisë së Kosovës në momentin e ngjarjes në Banjskë. Ai theksoi se ndalimi i Spahiut është pjesë e përpjekjeve të Serbisë për të komprometuar imazhin e Policisë së Kosovës dhe për të frikësuar zyrtarët e saj.
Në një intervistë për Tëvë1, Hoxha theksoi se “ne kemi dorëzuar çdo dokument të nevojshëm dhe besojmë se drejtësia do të triumfojë, megjithëse e dimë që në Serbi është sfidë të besohet në sistemin e drejtësisë.”
Për më tepër, Ministria e Punëve të Jashtme e Kosovës ka apeluar për qytetarët e Kosovës që të shmangin kalimin përmes Serbisë, për shkak të rritjes së rasteve të ndalimit dhe arrestimeve arbitrare, duke e cilësuar këtë si një shkelje të drejtave të njeriut.
