Ish-ambasadorja e Kosovës në SHBA, Vlora Çitaku, ka thënë se ngërçi institucional i shkaktuar nga moskonstituimi i Kuvendit të Kosovës po i kushton shtetit me pasoja të rënda politike, ekonomike dhe sociale, shkruan Mitropol.
Çitaku tha se e gjithë kjo situatë është rezultat i egoizmit politik të kryeministrit Kurti dhe ambicies së ministres Haxhiu për t’u bërë kryetare e Kuvendit.
” Ne tash e gjashtë muaj nuk flasim për 200 mijë pensionistë të Kosovës, të cilët në fund të muajit duhet të zgjedhin mes barnave dhe ushqimit. Nuk flasim për mijëra mësues dhe punëtorë të sektorit të arsimit, të cilët ballafaqohen me sfida të mbijetesës. Nuk flasim për policët, nuk flasim për ushtarët, nuk flasim për mjekët, nuk flasim për 140 mijë punëtorë të sektorit privat, vendet e punës të të cilëve po rrezikohen nga vendimet arbitrare të qeverisë Kurti në sektorin e energjisë” është shprehur Çitaku.
Ajo e ka cilësuar situatën politike në vend si “tërësisht të paimagjinueshme” për një shtet që ka fituar lirinë dhe pavarësinë me aq shumë sakrificë, ndërsa akuzoi udhëheqësit aktualë për dështim në ruajtjen e aleancave perëndimore dhe rrënimin e bashkëpunimit ndërkombëtar.
