Autoriteti Kombëtar i Ushqimit (AKU) i Shqipërisë para disa ditësh kishte konfirmuar se një ngarkesë me fileto pule të ngrirë nga Brazili, e importuar përmes Portit të Durrësit, ka rezultuar e kontaminuar me salmonelë. Sipas analizave të kryera më 21 mars në Institutin e Sigurisë Ushqimore dhe Veterinare (ISUV), është konfirmuar prania e bakterit Salmonella Typhimurium në mishin e bardh të brendit “Copacol”.
Veriu.info më 1 prill ka raportuar për këtë brend të mishit të bardh, ku nga Agjencia e Ushqimit dhe Veterinarisë na ishte thënë se janë duke ndërmarrë veprimet për të hequr dyshimet e ngritura.
Një ditë pas shkrimit të Veriu.info (dje), Agjencia e Ushqimit dhe Veterinarisë ka ndërmarrë veprime ekzekutive për të gjurmuar mishin, duke marrë 10 mostra të ndryshe, prej tyre 7 në kufi, 2 në pika shitëse (markete) dhe 1 në depon e importuesit, që sipas burimeve të Veriu.info bëhen fjalë për kompaninë “Kajmak” Sh.P.K.
“Agjencia e Ushqimit dhe Veterinarisë përmes trupave inspektuese ka ndërmarr të gjitha veprimet ekzekutive, për të kryer gjurmim të plotë, për mishin me origjinë nga Brazili. Deri me tani janë mostruar 7 ngarkesa, të ardhura nga importi. Nga secila është marrë nga një mostër, ku sipas procedurës ngarkesat mbesin të bllokuara deri në nxjerrje të rezultateve. Po ashtu në kontrollin e brendshëm janë realizuar dy kontrolle në pika shitëse, nga të cilat janë marrë dy mostra nga lote të ndryshme prodhimi. Sasitë sipas lotëve të mostruara janë tërhequr dhe bllokuar deri në rezultate”, ka thënë për Veriu.info zëdhënësi i AUV-it, Lamir Thaçi.
Veriu.info sot ka vizituar dy prej super marketeve kryesore në Mitrovicë, Interex dhe Viva Fresh Store për të parë se a është në shitje aty brendi “Copacol” i mishit të bardh, ku kemi vërejtur se në të dy këto biznese ka qenë në shitje ky mish, me ç’rast gazetari i Veriu.info ka blerë në Viva Fresh Store2 kg mish të bardh “Copacol” për të dëshmuar në mënyrë faktike se mishi është në shitje me këtë datë (03.04.2025).
Nga AUV kanë bërë të ditur se është inspektuar edhe depoja e impotuesit të mishit.
“Është inspektuar edhe depoja e operatorit e ekonomik importues, tek e cila përveç masës se ndalesës se përkohshme të nxjerrjes në treg të produktit në stok. Edhe në ketë rast është marrë një mostër”, ka thënë Thaçi për Veriu.info.
Burime të sigurta të Veriu bëjnë të ditur se kompania importuese e mishit të bardh “Copacol” në Kosovë është “Kajmak” Sh.P.K. më bazë në Prizren, pronar i vetëm i së cilës është Emin Hamza, përderisa kapitali i kompanisë në ARBK figuron në vlerë prej 7 milionë euro.
Veriu.info i ka dërguar dje pyetje kompanisë “Kajmak” Sh.P.K., duke e pyetur se pas skandalit ne Shqipëri, a keni bërë verifikime për gjendjen e mishit të pulës “Copacol’ që e shitni në Kosovë në lidhje me mundësinë e kontaminimit me salmonelë, çfarë sasie mishi pule “Copacol” keni importuar në Kosovë në vitin 2025 dhe sa prej mishit “Copacol’ te importuar nga kompania juaj gjendet momentalisht në treg. Por deri në momentin e publikimit të lajmit nuk kemi marrë përgjigje.
Burime të Veriu.info nga Dogana e Kosovës bëjnë të ditur se sasia e mishit të pulës “Copacol” e importuar në Kosovë gjatë vitit 2025 është rreth 30 kontejnerë.
Zëdhënësi i AUV, Lamir Thaçi për Veriu.info ka thënë se të gjitha mostrat janë mbledhur nga pikat kufitare dhe kontrolli i brendshëm, janë dërguar në laborator dhe ka nisur procesi i testimit.
“Për kohen e nxjerrjes se rezultateve, nuk mund të japim afat ose datë tani. Gjithçka varet nga dinamika e procesit në testim nga laboratori. Në momentin e parë të nxjerrjes se rezultateve, do ta informojmë publikun me të gjeturat”, ka përfunduar Thaçi.
Çka është Salmonela?
Salmonela është një infeksion bakterial Salmonella që shkakton diarre, ethe dhe dhimbje stomaku. Vetëm në Shtetet e Bashkuara, më shumë se një milion njerëz infektohen me Salmonela çdo vit dhe 26,500 shtrohen në spital. Ka rreth 420 vdekje për shkak të Salmonellës çdo vit në Shtetet e Bashkuara.
