Lëvizja Vetëvendosje e ka përjashtuar nga Grupi Parlamentar, deputetin Haki Abazi.
Ai, sot në seancën plenare të Kuvendit të Kosovës, është parë i ulur vetëm, pas ulëseve të deputetëve të Aleancës për Ardhmërinë e Kosovës, afër deputetit të larguar nga LVV-ja, Fatmir Humolli.
E lidhur me këtë çështje, ky i fundit e komentuar për Front Online largimin e deputetit Abazi nga Vetëvendosja.
Deputeti i pavarur, Fatmir Humolli thotë se deputetët e Vetëvendosjes nuk janë të kënaqur me gjendjen brenda partisë.
“Një gjë e di që shumica e deputetëve nuk janë duke e pranuar këtë gjendje çfarë është. Janë duke e vlerësuar këtë gjendje se nuk është e mirë”, shprehet ai për Front Online.
Humolli nuk e përjashton mundësinë edhe për largime të tjera nga Vetëvendosja.
Sipas tij, partia e Vetëvendosjes duhet të bëjë një vetëkritikë të brendshme, e jo qasje të gabueshme.
“Këtu është puna e dinjitetit, përgatitja politike e secilit deputet, por jam i bindur që mundësitë pas largimit të Hakiut, ka mundësi që tash me i mobilizu Vetëvendosjen me bë një vetëkritikë të brendshme që me bë punë më mirë. Në qoftëse nuk bëjnë punë më të mirë atëherë ata i qasen gabimisht deputetëve, pastaj deputetët kanë mundësi edhe me reagu edhe me largim vet, ashtu siç jam largu unë, si është largu Hakiu”, u shpreh ai për Front Online.
Ndryshe, lidhur me përjashtimin e tij, deputeti Abazi ka pretenduar se kjo ka ndodhur pak ditë pasi presidenti serb, Aleksandar Vuçiq ia ka përmendur emrin në Kuvendin e Serbisë.
Për dy vite qeverisje, Lëvizja Vetëvendosje humbi tre deputetë nga grupi i vet parlamentar. Doarsa Kica-Xhelili e Listës GUXO, Haki Abazi e Fatmir Humolli janë tre deputetët që nuk janë më pjesë e VV-së në Kuvendin e Kosovës.
