Ish ambasadorja, njëherësh ish-deputetja e Kuvendit të Kosovës Alma Lama, ka folur për çështjen e hapjes së urës së Ibrit, insistimin e Qeverisë për këtë dhe kundërshtimin e aleatëve ndërkombëtarë.
Ajo në një prononcim për Gazeta Blic, thotë se qeveria e ka bërë këtë temë aktuale për të mbuluar dështimet në fushat tjera, teksa pyet se pse qeveria nuk e ka hapur urën deri tani, që kur erdhi në pushtet.
“Hapja e urës së Ibrit është bërë temë nga qeveria me synimin për të mbuluar dështimet në sektorët e tjerë, ekonomia, shëndetësia, arsimi, etj. Nëse sipas logjikës së qeverisë, ura duhet të hapet tani pasi është çështje e drejtë, pavarësisht se është një problem politik që e mban peng prej një dekade, pse nuk e hapi kur erdhi në pushtet, menjëherë”, thekson Lama.
Sipas saj, vendosmëria e KFOR-it dje tregoi se ura shihet si burim tensionesh ndëretnike dhe qeveria ishte e pavendosur derisa nuk guxoi t’i dërgojë policët për hapjen e saj, derisa këtë e quan shfaqje muskujsh të panevojshme.
“Mendoj se dje u pa qartë vendosmëria e KFOR-it i cili e sheh urën si burim tensionesh ndëretnike, dhe pavendosmëria e qeverisë e cila nuk guxoi të dërgojë policët për ta hapur. Pra, pati një shfaqje muskujsh, krejtësisht të panevojshme, që nuk shkon në favor të Kosovës”, thekson Lama për Gazeta Blic.Ish ambasadorja vlerëson se qeveria po i sfidon ndërkombëtarët tek të cilët ka humbur besim, derisa e quan dështim të madh diplomatik për Kosovën që aleatët dolën kundër hapjes së urës.
“Kjo qeveri nuk ka arritur t’i bindë vendet partnere dhe të koordinohet me to për çdo veprim, por vepron në mënyrë të njëanshme duke i sfiduar, dhe si pasojë e ka humbur besueshmërinë të ndërkombëtarët. Fakti që ata dolën me deklarata që ura të mos hapet tani është dështim i madh diplomatik për Kosovën”, deklaron Alma Lama.
