Analistja Luljeta Aliu ka dështuar që të fitojë votat e mjaftueshme për të zënë një vend si anëtare e Komisionit të Pavarur për Media.
Ajo është rrëzuar në raundin e parë të votimit në seancën e Kuvendit që po zhvillohet sot. Luljeta Aliu nga deputetët e Kuvendit të Kosovës mori vetëm 12 vota.
Disa orë para votimit Luljeta Aliu në një postim në Facebook kishte kërkuar nga deputetët e Kuvendit të Kosovës që ta votojnë si anëtare të këtij Komisioni. Ajo kishte sqaruar edhe disa nga arsyet se pse duhet të bëhet pjesë e këtij komisioni.
Ndërkohë që anëtarë të KPM-së nga komuniteti shumicë janë zgjedhur Besnik Berisha që ka marrë 70 vota dhe Jeton Mehmeti që ka marrë 56 vota. Nga 83 deputetë sa votuan 3 fletëvotime ishin të pavlefshme.
Kurse, nga komuniteti jo shumicë anëtarë i KPM-së është zgjedhur Fatih Basha që morri 75 vota të deputetëve. Nga ky votim 4 fletëvotime ishin të pavlefshme.
Fatih Basha dhe Jeton Mehmeti do të kenë mandat tre vjeçar në KPM kurse Besnik Berisha do të ketë mandat katër vjeçar në këtë komision.
Gjithashtu për tu bërë pjesë e KPM-së dështuan edhe Visar Xani që morri 16 vota dhe Lendrit Qeli që morri 4 vota.
