Tri tërmete me magnitudë 4.8, 4.5 dhe 4.2 kanë tronditur provincën Malatya të Turqisë të shtunën, duke bërë që banorët të dalin jashtë shtëpive të tyre vetëm dy ditë pasi një tërmet tjetër tronditi provincën.
Sipas mediave të huaja, përcjell Telegrafi, dy lëkundjet e para, të cilat ndodhën vetëm një minutë njëra nga tjetra, ndodhën në orën 16:39 sipas kohës lokale në një thellësi prej 6.35 kilometrash, sipas Autoritetit të Menaxhimit të Fatkeqësive dhe Emergjencave (AFAD).
Ndërsa lëkundja e tretë, u zhvillua një orë më vonë, tha AFAD.
Siç bëhet e ditur më tej, epiqendra e të tre tërmeteve ishte rrethi Yeşilyurt, i njëjtë me epiqendrën e tërmetit me magnitudë 5.3 që ndodhi të enjten.
Ministri i Brendshëm Ali Yerlikaya vuri në dukje se autoritetet, përfshirë AFAD, po skanojnë zonën për të përcaktuar ndonjë dëm material ose fizik.
Tërmetet u ndjenë edhe në rajonin e afërt, duke përfshirë provincën Şanlıurfa.
Një tërmet me magnitudë 5.3 goditi Malatya të enjten, por nuk u raportuan dëme serioze nga ai tërmet.
Ndryshe, më 6 shkurt, një numër tërmetesh, dy me magnitudë 7.7 dhe 7.6 goditën Turqinë juglindore, duke shkatërruar shtëpi, infrastrukturë rrugore dhe pjesë të qyteteve, duke rezultuar në vdekjen e të paktën 50,000 njerëzve dhe plagosjen e mijëra të tjerëve.
Vendi shpalli gjendjen e jashtëzakonshme pas katastrofës tragjike, ndërsa u zotua të rindërtojë qytetet e shkatërruara nga tërmetet.
Videon mund ta shikoni KETU.
