Gazeta Sinjali raportoi sot ekskluzivisht për plagosjen me armë zjarri në qendër të Klinës, ku u përfshinë dy familje, Daka dhe Gashi dhe si pasojë mbetën të lënduar dy persona, Fitim Gashi dhe Rasim Daka. Nga familja Daka, sipas informatave të para, janë të dyshuar vetë Rasim Daka dhe Maliq e Etrur Daka. Por sipas burimeve të Sinjali edhe Zafer Gashi, babai i të plagosurit Fitim Gashi po dyshohet për këtë rast.
Edhe pse Zafer Gashi, i cili është me profesion doktor dhe ushtron detyrën e asamblistit nga radhët e Vetëvendosjes, në një prononcim për Sinjalin tha se ai dhe djali i tij kanë qëlluar rastësisht në rastin me familjen Daka, Policia e arrestoi si të dyshuar.
“Ne kemi qëllu rastësisht në një fjalosje edhe plumbi ka ra gabimisht, fatkeqësisht, pa dashje te ky djali jem. Kaq”, tha ai për Sinjalin.
Zaferi, bashkë me djalin e tij Fitimin, tre anëtarët e familjes Daka, si dhe Veton Pukën po dyshohen se janë të përfshirë në këtë rast.
Burimet e Sinjalit thonë se në këtë përleshje u përdorën armë nga Fitim Gashi dhe Rasim Daka, ndërsa të dyshuarit e tjerë janë përfshirë në rrahje.
Sipas burimeve brenda spitalit, Fitimi ka pësuar plagë në këmbë, ndërsa Rasimi është plagosur në bel, teksa Maliq Daka ka dëmtuar disa dhëmbë gjatë përleshjes.
Njësia policore që ka intervenuar në vendin e ngjarjes ka gjetur dhe sekuestruar një sprej dhe një brisk, kurse hetimet kanë nisur për veprat penale “vrasje në tentativë dhe pjesëmarrje në rrahje”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
