Një mosmarrëveshje mes disa personave në Vushtrri ka eskaluar në përdorimin e armës së zjarrit, duke trazuar banorët në rrugën “Ajet Gerguri” mbrëmjen e së martës. Disa persona përfunduan në Polici si të dyshuar, ndërsa rasti tashmë është iniciuar, raporton Gazeta Sinjali.
Burimet e Sinjalit brenda kanë bërë të ditur se katër personat e përfshirë në incident janë L.Maliqi, A.Maliqi, A.Maliqi dhe O.Z.
Bazuar në informacionet e para, O.Z., i moshës së mitur fillimisht ka pasur një përplasjeje verbale me tre të dyshuarit e tjerë e më pas ka nxjerrë një armë zjarri nga brezi dhe ka shtënë një herë.
Si pasojë, gjatë përpjekjes nga tre të dyshuarit për t’ia marrë armën nga dora, i mituri ka pësuar lëndime të lehta trupore, për çka ka marrë trajtim mjekësor.
Policia ka arrestuar të gjithë të dyshuarit dhe i ka shoqëruar në stacion policor, ndërsa është konfiskuar arma e përdorur në rast.
Pas intervistimit, me urdhër të prokurorit, ndaj të dyshuarve është iniciuar rasti për veprat “Mbajtje në pronësi, kontroll apo posedim të paautorizuar të armës”, “Përdorim të armës” dhe “Lëndim i lehtë trupor”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
