Njëzet e një fshatra të Komunës së Prishtinës prej më shumë se dy vjetësh e gjysmë vazhdojnë të jetojnë pa qasje në ujë të pijshëm dhe pa lidhje me rrjetin e ujësjellësit. Edhe pse kryetari i Prishtinës, Përparim Rama, kishte premtuar se do ta zgjidhte këtë problem, deri më tani nuk është ndërmarrë asnjë veprim konkret, ndërsa banorët vazhdojnë të përballen me mungesën elementare të ujit.
Ekipi i Gazetës Online Reporteri.net ka vizituar fshatin Marec, një nga fshatrat e prekur nga ky problem. Qytetarët e këtij lokaliteti tregojnë për kushtet e vështira në të cilat jetojnë.
“Qe dy vjet e gjysmë na ujë të pijshëm nuk kemi. Ujin e blejmë,” thotë një qytetar i këtij fshati, i cili shton se, përveç mungesës së ujit, banorët përballen edhe me probleme me rrymën dhe rrugët e parregulluara.
Ai thotë se kanë bërë disa herë kërkesa në Komunën e Prishtinës dhe se, përkundër premtimeve, asgjë nuk është zgjidhur.
Sipas tij, uji që e kanë në dispozicion përdoret vetëm për pastrim dhe ujitjen e bahçeve, ndonëse është i ndotur dhe i rrezikshëm për shëndetin.
“Vetëm para zgjedhjeve vizitohemi nga politikanët,” shton ai, duke shprehur zhgënjimin ndaj mungesës së përkujdesjes institucionale.
Banorët thonë se, për shkak të kushteve të rënda, shumë njerëz janë detyruar ta braktisin fshatin.
Gazeta Online Reporteri.net ka pritur për më shumë se dy javë një përgjigje nga Komuna e Prishtinës lidhur me këtë çështje. Madje, në një përpjekje për të marrë sqarime nga kryetari Përparim Rama, gazetarja Leonora Kolukaj është shtyrë nga një pjesëtare e kabinetit të tij, ndërsa vetë Rama ka përdorur gjuhë seksiste ndaj saj.
Nga ana tjetër pas kësaj pritjeje ka folir drejtori i Infrastrukturës në Komunën e Prishtinës, Sokol Havolli. Ai ka deklaruar se çështja e furnizimit me ujë është në kompetencë të Ujësjellësit Rajonal “Prishtina”.
“Komuna për katër vite ka investuar në 34 kilometra rrjet të kanalizimit dhe ujësjellësit. Ne do ta arrinim ta realizonim sikur t’i kishim pikat ose zgjidhjet teknike nga ujësjellësi,” ka thënë ai.
Havolli tha se Komuna do të punojë që të gjitha fshatrat të kenë ujë të pijshëm.
