Kryeministri i Kosovës, Albin Kurti, është pritur në Ankara nga presidenti i Turqisë, Rexhep Tajip Erdogan.
Kurti e vlerësoi takimin si me rëndësi të madhe. Megjithatë, fjalë të njëjta për presidentin turk, kryeministri i Kosovës nuk kishte sa ishte në opozitë.
Në një debat në Top Channel, Kurti kishte thënë se Turqia është autokraci. Pra, duke lënë të nënkuptohet pushtetin e gjatë të Erdoganit.
“Nuk mund të them që Turqia sot është një vend demokratik, më shumë është vend autokraci, por nuk është as diktaturë. Fakteqësisht jetojmë në kohën kur autokracitë janë në modë, edhe Orbani, edhe Putini edhe Gruevski edhe Gjukanoviqi”, thoshte Kurti në Top Channel, raporton Nacionale.
Në një tjetër seancë të Kuvendit, Kurti e krahason presidentin turk me presidentin e Rusisë, Vladimir Putin. Kjo duke theksuar se ka tendenca autokratike.
“Ngjashëm siç po bëjnë edhe autokratët e tjerë në Ballkan e në Lindje në përgjethsi. Prej Orbanit në Hungari, te Vuçiqi në Serbi, te Gjukanoviqi në Mal të Zi, te Gruevski në Maqedoni, e deri te Erdogani në Turqi e Putini në Rusi. Pra ka tendencë autokratike”, deklaronte Kurti./Nacionale
