Ambasadori i Kosovës në Gjermani, Faruk Ajeti ka shpërndarë të dhëna të pasakta sa i përket rritjes së Bruto Produktit Vendor për Kosovën.
Ajeti ka cituar disa të dhëna nga revista gjermane “Fokus Online”, shkrimi i të cilës thotë se Kosova ka një rritje të PBB-së me +8.51%.
“Lajm i shkëlqyer për Kosovën! Sipas analizës së „BestBrokers“, bazuar në të dhënat e FMN-së dhe të publikuara nga revista gjermane FOCUS online, periferia e Evropës po shfaq rritje ekonomike të shpejtë – dhe Kosova, me një rritje reale të PBB-së prej +8,51 %, renditet ndër ekonomitë më të shpejta në kontinent. Një sinjal i fuqishëm për të ardhmen tonë”, shkruan ambasadori.
Megjithatë, sipas të dhënave prej Bankës Botërore, gjatë vitit 2024 kishte një rritje të PBB-së prej 4.4% e për vitin 2025, parashikimi sipas Fondit Monetar, rritja është 3.9%.
Analiza të cilës i referohet Ajeti është e një web faqes që merret me tregjet ndërkombëtare të investimeve.
“Misioni ynë si ekip është t’i ndihmojmë tregtarët të marrin vendime të informuara mirë kur zgjedhin një platformë tregtare”, thuhet në website.
Po ashtu, llogaritja “Real GDP” e Best Brokers bazohet në një metodë që llogaritë periudhën kohore 10 vjeçare, pa marr parasysh rritjen e çmimeve.
“Real GDP llogaritet duke pjesëtuar PBB-në nominale me deflatorin, i cili publikohet gjithashtu nga FMN-ja në mënyrë të rregullt”, thuhet në website.
Lidhur me këtë postim të Ajetit ka reaguar edhe analisti Shenoll Muharremi që thotë po ashtu se është fake news.
“Ambasadori i Republikës së Kosovës në Gjermani duhet menjëherë me fshi këtë postim dhe me kërku falje. Ky është një FAKE NEWS, sepse Kosova nuk ka pasur rritje prej 8.51% gjatë vitit 2024, e as në ndonjë vit tjetër më herët”, shkruan ai.
Tutje bën thirrje që të mos instrumentalizohet shërbimi diplomatik nga partia në pushtet.
“Shërbimi diplomatik i Kosovës nuk duhet me u instrumentalizu dhe me u përdor nga qeveria për propagandë gjatë kohës së zgjedhjeve. Ambasadori duhet me pas kujdes dhe me i kontrollu e vërtetu të dhënat para se me i publiku, nëse dëshiron mos me shpërfaqë globalisht injorancën e ambasadës dhe shërbimit diplomatik të Kosovës. Kredibiliteti i Kosovës dhe institucioneve publike është shumë më i rëndësishëm sesa fati i një partie politike në zgjedhje. Kjo është për keqardhje dhe konfirmon që shërbimi diplomatik po abuzohet dhe instrumentalizohet për qëllime politike në dëm të vendit dhe interesit publik”, përfundon ai.
