Kryetari i Kuvendit, Glauk Konjufca, në Ditën Memoriale të të Mbijetuarve të Dhunës Seksuale gjatë luftës së fundit në Kosovë, ka thënë Serbia ka përdorur dhunën seksuale si armë lufte dhe instrument të spastrimit etnik.
Ai tha se kryesit e këtyre krimeve vazhdojnë të ecin të lirë nëpër Serbi, derisa u zotua se për krimin e gjenocidin e kryer në Kosovë, do ta mbajnë gjithmonë përgjegjëse Serbinë.
“Dhuna seksuale ishte pjesë e strategjisë së luftës së Serbisë për t’i shkaktuar frikë, terror dhe madje edhe gjenocid popullatës shqiptare në Kosovë. Ky krim përbën një ndër krimet më të rënda të luftës. Por edhe sot, 24 vjet pas luftës, përdhunues dhe vrasës ecin lirshëm nëpër Serbi. Këto krime të egra nuk parashkruhen, nuk falen, as nuk harrohen. Herët a vonë kriminelët do të përballën me drejtësinë”, ka shkruar sot Konjufca.
Institucionet e vendit kanë caktuar 14 prillin si ditë për të mbijetuarit e dhunës seksuale gjatë luftës. Prandaj, sot krerë institucionalë, aktivistë e qytetarë bënë nderime te Memoriali i Heroinave në kryeqytet.
Postimi i plotë:
14 Prilli – Dita Memoriale e të Mbijetuarve të Dhunës Seksuale gjatë luftës së fundit në Kosovë – shënon një ditë të rëndësishme reflektimi mbi dhimbjet dhe vuajtjet e viktimave të krimeve të luftës dhe krimeve kundër njerëzimit, të kryera nga formacionet ushtarake dhe policore serbe.
Përveç vrasjes dhe masakrimit të popullatës së pafajshme, gjatë viteve 1998-1999, regjimi gjenocidal i Serbisë përdori në Kosovë dhunën seksuale si armë lufte dhe instrument të spastrimit etnik. Mijëra gra e vajza, burra e djem qenë viktima të përdhunimit.
Dhuna seksuale ishte pjesë e strategjisë së luftës së Serbisë për t’i shkaktuar frikë, terror dhe madje edhe gjenocid popullatës shqiptare në Kosovë. Ky krim përbën një ndër krimet më të rënda të luftës. Por edhe sot, 24 vjet pas luftës, përdhunues dhe vrasës ecin lirshëm nëpër Serbi.
Këto krime të egra nuk parashkruhen, nuk falen, as nuk harrohen. Herët a vonë kriminelët do të përballën me drejtësinë.
Le të bashkohemi, jo vetëm një ditë, rreth qëllimit të përbashkët për solidarizim me të mbijetuarit e dhunës seksuale gjatë luftës dhe të bëhemi zë i fuqishëm kundër stigmës dhe padrejtësive ndaj tyre.
Për të gjitha krimet dhe gjenocidin në Kosovë, do ta mbajmë gjithmonë përgjegjëse Serbinë!
