Dritan Isufi, i cili është zyrtar i graduar në Doganën e Kosovës, po shkel udhëzimin administrativ të Doganës së Kosovës, e cila ia ndalon pjesëmarrjen në aktivitete partiake. Isufi është parë në një tubim në Ferizaj të Lëvizjes Vetëvendosje, parti kjo me të cilën garon për deputete bashkëshortja e tij, Shqipe Metaj- Isufi.
Ka qenë vetë Metaj- Isufi që ka shpërndarë fotografitë nga tubimi, ku prezent është parë bashkëshorti i saj, Dritan Isufi, oficier doganor në Doganën e Kosovës.
Zyrtari doganor përveçqë është parë me bashkëshortën e tij, i njëjti është ekspozuar politikisht duke dalë në fotografi edhe me Vigan Qorrollin e VV’së nga salla ku po mbahej tubimi i këtij subjekti politik.
Gazeta Insajderi ka arritur të sigurojë një komunikim të Standardeve Profesionale të Doganës së Kosovës, e cila ua rikujton kufizimet për zyrtarët doganorë lidhur me aktivitetet politike.
“Për vëmendjen tuaj, po ju rikujtojmë kufizimet që janë për zyrtarët doganor lidhur me pjesëmarrjen në aktivitete politike, komenteve politike, pjesëmarrje në fushata elektorale apo nëpër tubime të partive politike për zgjedhjet nacionale që do të mbahen ne këtë fund vit. Legjislacioni Doganor, gjegjësisht Neni i Kodit Mirësjelljes për zyrtarët doganor në mënyrë specifike kufizon zyrtarët që të bëjnë komente publike për çështjet që kanë të bëjnë me politika apo programet e partive politike si dhe kufizon zyrtarët doganor që të marrin pjesë në çfarëdo aktiviteti politik dhe publik, që mund të rrezikoj apo duket se rrezikon paanësinë e tyre në punën e tyre si zyrtar doganor”, thuhet në një email që iu është dorëzuar punonjësve doganorë.
“Gjithashtu, sipas Udhëzimin Administrativ për Rregullimin e Marrëdhënies së Punës së oficerëve doganor një ndër parimet bazë të punës së Doganës është neutraliteti politik dhe objektiviteti, shërbim besnik i stafit për Doganën e Kosovës, pa frikë apo favorizim dhe pa marrë parasysh pikëpamjet politike apo statusin tjetër”, vijon emaili.
Sektori i standardeve profesionale i Doganës së Kosovës paralajmëron inicim procedurash dhe masa disiplinore për këdo që shkel këto kufizime të vendosura përkitazi me Kodin e Mirësjelljes.
Sidoqoftë, duarkryq institucione të tjera nuk qëndronin kur bëhej fjalë për pjesëmarrje në tubime të partive të tjera politike. Idriz Gashi kishte humbur legjitimitetin policor dhe ishte suspenduar nga puna, pasi të njëjtit i kishte dalë një fotografi në një tubim të PDK-së në fushatën zgjedhore të janarit të këtij viti.
