Ramadan Beshiri ka shpallur zyrtarisht kandidaturën e tij për kryetar të Lëvizjes Vetëvendosje në Mitrovicë.
Këtë e bëri të ditur vet Beshiri përmes një postimi në Facebook.
Ai tha se jeta në Mitrovicë është e vështirë, duke shtuar se përveç konfliktit ndër-etnik, pjesa dërrmuese e të rinjëve nuk kanë ambicie as për lidhje martesore.
Andaj sipas tij duhet punuar për të rikthyer besimin qytetar të humbur me 17 tetor 2021.
Postimi i plotë:
I nderuar Kryetar z. Albin Kurti,
Sekretare Organizative z. Vlora Haxhimehmedi,
Të dashur qytetarë, aktivistë e anëtarë të Lëvizjes VETËVENDOSJE – Qendra në Mitrovicë!
Kam kënaqësinë të ju informoj që sot paraqita në KZAQ, kandidaturën time për Kryetar të Lëvizjes VETËVENDOSJE – Qendra në Mitrovicë!
Nga nevoja buron kurajo, e nga kurajo ndërtohen liderët e rinjë. Jo, nuk kam konsumuar medikamente për vetëbesim as nuk kam pranuar dhurata nga askush në politikë, thjesht askush nuk më ka përkëdhelur ëndrrën përveç Zotit.
Si qytet me tipare të theksuara të lokalizmit, jemi fanatikë ta kemi një adresë të fuqishme politike.
Ne besojmë fuqishëm se po vjen ajo ditë, kur Mitrovica do të zgjohet krenare me degën e reformuar të Lëvizjes VETËVENDOSJE!
Mitrovica e Isa Boletinit, Mitrovica e Haki Misinit, Mitrovica e familjes Qena e Mikullovci, Mitrovica e Artim Jasharit, Shemsi Ahmetit e Safet Boletinit. Mitrovica e Besim Nukës, e veprimtarit të shquar Mehë Ukës, Mitrovica e punës, dijes e artit po këmbon për një adresë të konsoliduar politike.
Njerëz të mirë e qytet i dashtun, kjo nuk është lutje as kërkesë e domosdoshme, është ofertë serioze e mirëmenduar. Pushteti për një njeri i cili i frikësohet Zotit nuk është privilegj, është përgjegjësi e madhe. Prandaj i kemi përvishur mangët e kemi punuar me përkushtim të plotë në planin e veprimit për katër vitet e ardhshme, secili vit kalendarik do ta ketë misionin e tij të veçantë në fokus, poashtu kemi projektuar platformën për reformimin e degës së Lëvizjes VETËVENDOSJE – Qendra Mitrovicë brenda mandatit (2022-2026) dhe një varg projeksionesh që do të na rikthenin fuqishëm në pushtetin lokal.
Ne jemi ulur dhe kemi biseduar me shumë aktivistë e anëtarë të Lëvizjes VETËVENDOSJE! në Mitrovicë, e kemi ndëgjuar zërin e votuesit të 14 shkurtit dhe votuesin tonë tradicional.
Oferta po rrjedh pikërisht nga influenca që zëri qytetar ka mbi ne. Fuqia jonë politike nuk përcaktohet nga muskujt as mjetet financiare, por ideja e thekur dhe e ndërtuar me mjaft sakrificë.
Kritika jonë ndër vite ishte për reforma brenda LVV-së në Mitrovicë sepse kualiteti i përfaqësimit të saj kishte diskrepancë me Prishtinën, në një moment të caktuar vlerësuam se nëse heshtim po shkelim parimet themeltare të Lëvizjes VETËVENDOSJE! dhe po thelloheshim në një krizë të madhe identiteti. Lëvizum siç jemi edukuar politikisht brenda Lëvizjes, duke e mirëmbajtur konceptin tonë politik nga toksinat e momentit.
Ne qëndruam ndër vite në parimet themeltare të Lëvizjes VETËVENDOSJE!, bindjen tona të kalitura në protesta e kundërshtime, tubime e shkolla politike nuk u lëkundën asniherë. Kishte tentativa e paragjykime kundër nesh por mbetën vetëm tentativa. Sepse ne nuk rritemi kur gjërat janë të lehta, rritemi kur hasim në sfida!
Dëshmi e pastër se autoriteti ynë publik po rritet, është entuziazmi qytetar, të cilin po e prodhojmë. Madje ende pa u mveshur me përgjegjësi brenda subjektit politik, jemi të preferuarit e qytetarëve në çdo matje online të opinonit.
Kjo përkrahje qytetare vjen, jo sepse tek ne e shohin pasurimin e tyre material në të ardhmën e afërt, as tendenca për privilegje të pamerituara. Por saktë, për arsye sepse ju kemi përmbushur pritshmëritë e qëndrimit konsistent në parime.
Ne mendojmë se kjo reformë duhet të projektohet me parametra afatgjatë, figurat që rrjedhin nga kjo reformë duhet të fillojnë maratonën. Organet e Lëvizjes VETËVENDOSJE! nuk duhet të bëjnë zgjedhjen më të mirë të momentit por zgjedhjen më të mirë të dekadës. Ne nuk jemi tavolinë “suedeze” në të cilën merr vetëm atë që të pëlqen, por nuk jemi as “laborator” eksperimental në të cilin bëhen prova, ne jemi ëndrra e një populli të tërë për shtet-ndërtim.
Gjatë kësaj periudhe duhet të ndërtojmë planet tona konkrete për fushat e ndryshme: për shërbime publike, shëndetësinë, arsimin, çështjen e punësimit dhe të investojmë në politika që lehtësojnë koston e jetesës. Një program për të kuruar plagën e emigracionit është imediat!
Ju e dini se sa vështirë është jeta në Mitrovicë, përveç konfliktit ndër-etnik, pjesa dërrmuese e të rinjëve nuk kanë ambicie as për lidhje martesore. Ju janë mohuar shkollimet e ngritjes profesionale duke qenë ekonomikisht dobët, nga problemet e kriza sociale janë involvuar në tregun e drogës dhe kontrabandës.
Pushteti lokal është leva kryesore për përmirësimin e përditshmërisë sonë.
Duhet të punojmë fuqishëm që të rikthejmë besimin qytetar të humbur me 17 tetor 2021.
Jemi të vetëdijshëm se po vijmë në një kohë delikate, por ndihemi të përgaditur. Është e nevojshme të vendosim rregull dhe të kemi kërkesa maksimale karshi angazhimit tonë.
Atdhe tjetër rezervë nuk kemi, prandaj jemi të përkushtuar ndaj Mitrovicës. Ne jemi e ardhmja e cila po rrjedhë natyrshëm pa imponime, kjo sepse kemi qenë aktiv tridhjetë vite në jetën publike të Mitrovicës përmes artit të muzikës, sportit, aktivitetit vullnetar e politik.
Ne tashmë kemi gjetur pikënisjen e përbashkët, koordinata është e saktë dhe duhet të ecim tutje.
Po e mbyll me një thënje të Dostojevskit: “Më jepni një dhimbje, t’ju jap një kryevepër.”
Me përulësi,
Mr.sc RAMADAN BESHIRI – Doni
