Këshilltarja e presidentes Osmani, Donika Kadaj Bujupi, ka reaguar pas ftesës personale të presidentit Trump për presidenten e Kosovës për Bordin e Paqes.
Kadaj Bujupi ka thënë se ky është një akt besimi politik dhe strategjik ndaj lidershipit që Kosova sot përfaqëson, raporton Gazeta Online Veriu.info.
“Këto zhvillime janë rezultat i një politike të jashtme të ndërtuar mbi parime, koherencë dhe dinjitet institucional — e udhëhequr nga Presidentja Osmani me vizion shtetformues dhe qartësi strategjike. Një lidership që e ka zhvendosur Kosovën nga pozita e kërkueses së mbështetjes, në rolin e partnereve që kontribuojnë në arkitekturën e paqes globale.” – shkruan ajo.
Postimi i plotë:
Viti që lamë pas u mbyll me njohje të reja për Republikën e Kosovës si konfirmim i një subjektiviteti shtetëror që po konsolidohet. Viti që po e nisim shënon kalimin nga afirmimi formal në ndikim real ndërkombëtar.
Ftesa personale për Presidenten Vjosa Osmani nga Presidenti i Shteteve të Bashkuara, Donald J. Trump, për ta përfaqësuar Kosovën si shtet anëtar themelues në Bordin e Paqes, nuk është thjesht një akt protokollar. Ajo është një akt besimi politik dhe strategjik ndaj lidershipit që Kosova sot përfaqëson.
Këto zhvillime janë rezultat i një politike të jashtme të ndërtuar mbi parime, koherencë dhe dinjitet institucional — e udhëhequr nga Presidentja Osmani me vizion shtetformues dhe qartësi strategjike. Një lidership që e ka zhvendosur Kosovën nga pozita e kërkueses së mbështetjes, në rolin e partnereve që kontribuojnë në arkitekturën e paqes globale.
Kosova po hyn në këtë kapitull të ri jo si spektatore e rendit ndërkombëtar, por si pjesëmarrëse me rol, përgjegjësi dhe peshë. Dhe kjo është arritje shtetërore me domethënie afatgjatë.
