Tre zyrtarë të Komunës së Prishtinës janë arrestuar dje nën dyshimin për marrje ryshfeti, ndërsa njëri nga ta është zënë në flagrancë duke marrë ryshfet.
Veriu.info ka siguruar kërkesën e prokurorit Eset Rama për caktimin e paraburgimit ndaj tre të pandehurve, Afrim Gashi, Dukagjin Gashi dhe Bashkim Sadiku, pasi dyshohet se në bashkëkryerje kanë kryer veprën penale “Marrja e ryshfetit”, lidhur me tenderin për mirëmbajtjen dimërore të rrugëve.
Në kërkesën për caktimin e paraburgimit thuhet se Afrim Gashi ishte zyrtar i lartë për infrastrukturë rrugore dhe menaxher i kontratës për mirëmbajtjen dimërore të rrugëve në Prishtinë, Dukagjin Gashi ishte udhëheqës i sektorit për menaxhimin e mbeturinave dhe ambientit, ndërsa Bashkim Sadiku ishte zyrtar i lartë për energji në Komunën e Prishtinës. Ndaj tyre është caktuar masa e ndalimit, ndërsa sot pritet të vendoset për masën e paraburgimit.
Sipas dosjes së Prokurorisë, të siguruar nga Veriu.info, ekziston dyshim i bazuar se gjatë muajit janar 2026, të pandehurit, në bashkëkryerje dhe pas një marrëveshjeje paraprake, kanë shfrytëzuar pozitën dhe autoritetin e tyre zyrtar për të kërkuar ryshfet nga Ekrem Gashi, pronar i kompanisë “Dardania SHPK”, fituese e tenderit për mirëmbajtjen dimërore të rrugëve në Prishtinë.
Hetimet tregojnë se zyrtarët dyshohet se i kanë kërkuar pronarit të kompanisë shumën prej 5,500 deri në 6,000 euro, apo rreth 10 për qind të vlerës së dy faturave të papaguara, me qëllim që t’i mundësonin ekzekutimin e pagesave për punët e kryera. Bëhet fjalë për dy fatura në vlerë mbi 55 mijë euro, që lidhen me kontratën publike “Mirëmbajtja dimërore e rrugëve – Lot 1”.
Prokuroria bën të ditur se më 27 janar 2026, gjatë realizimit të takimeve të dakorduara, i dyshuari Afrim Gashi është arrestuar në flagrancë në rrugën “Zagrebi” në Prishtinë, pasi dyshohet se ka pranuar shumën prej 2,000 euro ryshfet nga i dëmtuari. Po atë ditë, sipas dosjes së hetimit, janë zhvilluar edhe takime të tjera me dy të dyshuarit e tjerë, të cilat janë dokumentuar përmes masave të veçanta hetimore, përfshirë incizime audio dhe prova të tjera materiale.
Në kërkesën për paraburgim, Prokuroria thekson se ekziston rrezik real që të pandehurit, nëse mbrohen në liri, të ndikojnë në dëshmitarë, të asgjësojnë ose fshehin prova, si dhe të pengojnë rrjedhën normale të procedurës penale. Po ashtu, sipas Prokurorisë, pesha e veprave penale dhe pozitat e larta që kanë mbajtur të dyshuarit në Komunën e Prishtinës e bëjnë të domosdoshëm caktimin e paraburgimit.
Dyshimi i bazuar se të pandehurit kanë kryer veprat penale të lartcekura mbështetet në këto prova: deklaratat e dëshmitarit Ekrem Gashi; vërtetimin mbi sekuestrimin e sendeve; kontratën publike të mirëmbajtjes së rrugëve me numër të prokurimit 616-23-13231-2-1-1 “Mirëmbajtja dimërore e rrugëve – Lot 1”; faturat me numër 146-210-001-25 në vlerë 27,384.08 euro dhe 4-210-001-26 në vlerë 28,010.40 euro; fotografitë e parave të pranuara nga i pandehuri Afrim Gashi; dëshmitë e pranuara nga Telekomi i Kosovës – VALA dhe kompania IPKO, lidhur me lokacionet dhe thirrjet telefonike, si dhe CD-incizimet gjatë zbatimit të masave të veçanta hetimore lidhur me takimet mes të dëmtuarit – dëshmitar dhe të pandehurve.
Veriu.info mëson se tre të dyshuarit janë mbrojtur në heshtje.
Prokuroria ka propozuar që ndaj tre të pandehurve të caktohet masa e paraburgimit prej 30 ditësh, duke vlerësuar se masat më të buta nuk do të garantonin zhvillimin e rregullt dhe të papenguar të procedurës penale.
Të dyshuarit akuzohen për veprat penale “Keqpërdorim i pozitës apo autoritetit zyrtar” dhe “Marrje e ryshfetit”, ndërsa hetimet janë ende në vazhdim./Veriu.info
