Drejtori sportiv i klubit basketbollistik Trepça, Izet Tahiri, ka reaguar pas humbjes së ekipit mitrovicas në ndeshjen e pestë finale kundrejt KB Peja, raporton Gazeta Online Veriu.info.
Tahiri u ka kërkuar falje të gjithve që nuk u janë realizuar pritjet.
Sipas Tahrit megjithatë Trepça ka arritur suksese duke fituar dy kupa.
Postimi i plotë:
Të nderuar mitrovicas, tifozë të Trepçës
Emocione të përziera kemi në fund të një kampionati sfidues e përfundimisht të suksesshëm. Me mburrje themi se Trepça ka vendosur standard të ri, shumë më të lartë. Me mburrje themi se falë Trepçës e tifozëve tanë, sidomos “Torcidës”, basketbolli ka prekur kulmin sa i takon interesimit.
Sa i takon organizimit, po angazhohemi maksimalisht dhe po përmirësohemi. Por nga interesimi i jashtëzakonshëm edhe po sfidohemi shumë.
Niveli profesional në klub është ngritur shumë, por vend për vetëkënaqësi nuk ka. Na duhet ende punë.
Angazhimi nuk mungon. Sakrifica po ashtu. Për dy vjet e gjysmë më shumë jemi në palestër se në shtëpi, më shumë jemi me lojtarët se me familjet tona.
Kjo, megjithatë ia vlenë. Entuziazmi në qytet është dëshmi. Interesimi i mitrovicasve për Trepçën po ashtu.
Në aspektin sportiv suksesi është i madh. Ishim në të gjitha finalet dhe fituam dy Kupa. Në finalen e kampionatit ishim afër e megjithatë nuk ia dolëm. Na mungoi edhe fati. E dimë që dëshpërimi është i madh dhe kërkojmë falje që nuk realizuam pritjet tuaja.
Kemi duruar edhe sharje e fyerje të ndryshme. Por disi i kemi kaluar, pasi na mbanë dashuria e pastër për klubin.
Gjithsesi edicioni 2022/2023 është shumë i suksesshëm për Trepçën tuaj e tonën.
Kemi bazën mbi të cilën do të ndërtojmë tutje.
Rrugën e synimin e kemi të qartë – shumë finale, shumë trofe. Shumë emocione, shumë krenari.
Kur një qytet e ke prapa është më e lehtë por edhe me më shumë përgjegjësi.
Faleminderit dhe shihemi kampionatin e ardhshëm.
