Një skandal i ri dyshohet se ka goditur Doganën e Kosovës, ku një zyrtar i këtij institucioni është kapur në flagrancë nën dyshimet për lejimin e kontrabandës në pikën kufitare.
Portali Veriu.info mëson ekskluzivisht nga burimet e veta se bëhet fjalë për doganierin Arton Lushaku, i cili është zbuluar nga hetuesit e brendshëm duke lejuar një mjet transporti të kalojë kufirin pa asnjë kontroll.
Burime të mirëinformuara brenda institucioneve të sigurisë bëjnë me dije për Veriu.info se, pas verifikimeve të menjëhershme, hetuesit kanë konstatuar se vlera e mallit që u fut në Kosovë pa u kontrolluar dhe pa iu nënshtruar obligimeve doganore kap shifrën e rreth 20 mijë eurove.
U intervistua si i dyshuar me urdhër të Prokurorisë në Prishtinë
Pas zbulimit të rastit, në lojë ka hyrë edhe organi i akuzës. Me autorizim të Prokurorisë Themelore në Prishtinë, hetuesit e Doganës e kanë intervistuar zyrtarin Arton Lushaku në cilësinë e personit të dyshuar për keqpërdorim të detyrës zyrtare.
Pas përfundimit të marrjes në pyetje, prokurori i rastit ka vendosur që i dyshuari të lihet në procedurë të rregullt, që nënkupton se hetimet ndaj tij do të vazhdojnë pa masën e paraburgimit.
Dogana e suspendon sot nga puna
Përveç procedurës penale, Lushaku është goditur edhe me masa administrative nga punëdhënësi i tij. Veriu.info merr vesh se Dogana e Kosovës ka marrë vendim sot që zyrtari në fjalë të suspendohet nga puna menjëherë, masë kjo që do të mbetet në fuqi deri në përfundimin e plotë të hetimeve.
Veriu.info do të vazhdojë ta ndjekë këtë rast dhe do t’ju mbajë të informuar për detajet e reja, përfshirë llojin e mallit dhe origjinën e mjetit të transportit që kaloi pa kontroll në kufi. /Veriu.info
Shënim: Personi apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
