Zyrtarë të lartë të Vetëvendosjes, janë shprehur se ende duhet të pritet nëse i kanë apo jo numrat për votimin e qeverisë.
Deputeti i Lëvizjes Vetëvendosje, Armend Muja, komentoi në “Politiko” të Kanal 10 formimin e qeverisë së re dhe mundësinë e zgjedhjeve të reja.
Muja tha se të dielën përfundon afati i mandatarit, dhe pas konstituimit të Kuvendit, Albin Kurti është propozuar si mandatar nga VV dhe konfirmuar nga Presidentja Osmani.
“Përpjekjet po vazhdojnë, por ne duhet të presim deri të dielën për të ditur versionin dhe verdiktin final sa i perket eksekutivit. Besoj që ne mund të kemi Qeveri Kurti 3 deri të dielën”, shtoi ai.
Ai theksoi se deri në fundjavë mund të mbahet edhe ndonjë seancë e Kuvendit dhe vlerësoi rëndësinë e ndarjes së konstituimit të Kuvendit nga formimi i ekzekutivit, duke e quajtur këtë pjesë të maturisë demokratike.
Dita e diel pritet të përcaktojë nëse Lëvizja Vetëvendosje do të sigurojë shumicën për qeverinë e re, ka thënë ministrja në detyrë e Arsimit, Arbërie Nagavci.
“Të dielën është koha për të parë a janë numrat, unë besoj që përtej numrave që i kemi si lëvizje me 48 deputetëve tanë numrat e deputetëve të komuniteteve jo shumicë 8 prej tyre dhe votës së Rashiqit, shpresoj që do të ketë edhe deputet tjerë që do të reflektojnë edhe do t’i japin përfundimit të kësaj sage kaq të gjatë për votimin e qeverisë”, tha ajo në Debat Plus.
Nagavci gjithashtu vlerësoi se kryeministri në detyrë, Albin Kurti, ka vendosur standarde të reja politike, duke ndarë procesin e konstituimit të Kuvendit nga votimi i qeverisë.
“Kryeministri Kurti VV-ja në radhë të parë arriti të ndajë qarët konsittuimin e kuvendit edhe votimin e qeverisë si dy institucione të pavarura, pra nuk bëhet më fjalë për pazare për marrëveshje politike. Kurti arriti të vendosë standarde të reja duke mos e bërë Kuvendin institucionin më të lartë të Kosovë të varur nga Lista Serbe gjegjësisht nga Beogradi”, shtoi ajo.
Megjithatë, nuk dihet se ku mund t’i marrë votat VV-ja. PDK, LDK dhe AAK nuk kanë dhënë asnjë shenjë bashkëpunimi, kurse sipas deklaratës së Bilall Sherifit, edhe Nisma ia ka mbyllur derën partisë në pushtet.
“Pas atij takimit të famshëm të fundit, një ditë para seancës, atë natë Limaj ftoi Kryesinë e Nismës. Dhe na ka informu për bisedën me Kurtin. Dhe aty është marrë vendim “Jo në Qeveri, vetëm partneritet për Kuvned”, dhe kjo është miratu. Dhe nga ai moment nuk ka ndryshim”, tha Sherifi.
“Ka tentu Kurti të vendos kontakt me Limajn edhe pasi është zgjedh Dimal Basha. Zoti Limaj ka thënë që meqë nuk arritëm të konkretizojmë bashkëpunimin në parlament, ti nuk e ke pa të arsyeshme partneritetin në Kuvned, ju e dini mirë që nuk jam i interesuar për qeveri, ju uroj suksese mëtej. Ky është komunikimi i fundit që zoti Limaj ka pas me Kurtin”, tha ai në T7.
