Agjencia Kundër Korrupsionit (AKK) ka vijuar hetimet ndaj Donika Gërvallës, ministres së Punëve të Jashtme dhe Diasporës.
Lajmin e ka konfirmuar AKK-ja në një përgjigje me shkrim për Paparacin të enjten. Por, AKK-ja nuk ka sqaruar se në çfarë drejtimi është duke e hetuar konkretisht zëvendëskryeministren.
Agjencia, e cila heton rastet e dyshuara korruptive të zyrtarëve të lartë publikë, tha se hetimet ndaj ministres Gërvalla përfshijnë “mbledhjen, hulumtimin dhe analizimin e dokumentacionit” dhe informacioneve të tjera lidhur me rastin.
“Agjencia në asnjë rast nuk paragjykon rezultatin e hetimeve para se te kryhen të gjitha hetimet sipas legjislacionit në fuqi”, i tha AKK-ja, mediumit.
Më 2 tetor 2021, “Betimi për Drejtësi” raportoi se Gërvalla nuk ka deklaruar të gjitha funksionet në institucione vendore e ndërkombëtare.
Sipas këtij hulumtimi, rezultoi se Gërvalla nuk ka deklaruar se posedon biznes në Gjermani, nuk ka treguar se është drejtoreshë e një fondacioni në Kosovë dhe as nuk ka deklaruar pasurinë e burrit dhe fëmijëve të saj.
Institucioni i cili u rifunksionalizua në fund të vitit të kaluar, pas një periudhe disa mujore jo-funksionale si pasojë e lënies vakante të pozitës së drejtorit, ka denoncuar javën e kaluar ministren e Industrisë, Rozeta Hajdari.
Ajo dyshohet për mos-raportim ose raportim të rremë të pasurisë.
Drejtori i AKK, Yll Buleshkaj i tha Paparacit se kallëzimi penal kundër ministres Hajdari është dorëzuar në Zyrën e Kryeprokurorit të Shtetit.
“Ju njoftojmë se Agjencia kundër Korrupsionit (AKK), për zyrtarin në fjalë ka përcjell kallëzim penal në Zyrën e Kryeprokurorit të Shtetit lidhur me veprën penale ‘Mos raportimi ose raportimi i rremë i pasurisë’”, deklaroi ai.
Paparaci, mëson se Agjencia Kundër Korrupsionit është duke shqyrtuar edhe raste të tjera, që kanë të bëjnë me vepra të dyshimta penale të zyrtarëve shtetërorë.
