Shefi ekzekutiv i Twitter, Elon Musk tha më herët se ish-presidenti Donald Trump do të rikthehet në Twitter, pas rezultateve të një sondazhi të bërë po në Twitter, ku shumica e votuesve favorizuan rikthimin e tij.
“Njerëzit kanë folur. Trump do të rikthehet. Vox Populi, Vox Dei”, shkroi Musk në Twitter, duke cituar një frazë latine që do të thotë “zëri i popullit është zëri i Zotit”.
Ai e postoi njoftimin në Twitter menjëherë pas përfundimit të një sondazhi duke shtruar pyetjen “Rivendosni ish-Presidentin Trump”.
Mbi 15 milionë përdorues votuan në sondazhin, i cili ishte aktiv për 24 orë dhe përfundoi të shtunën mbrëma, me një shumicë të vogël, 51.8%, duke votuar në favor të rivendosjes së Trump.
Vendimi vjen gati dy vjet pasi llogaria e Trump, @realDonaldTrump, u pezullua përgjithmonë nga Twitter më 8 janar 2021, pas sulmit në Kapitol të SHBA më 6 janar 2021, nga mbështetësit e Trump në shenjë proteste kundër rezultateve të zgjedhjeve në 2020.
Llogaria e Trump @realDonaldTrump u bë sërish e dukshme në Twitter menjëherë pas njoftimit të Musk.
“Pas shqyrtimit të afërt të Tweet-eve të fundit nga llogaria @realDonaldTrump dhe kontekstit rreth tyre konkretisht se si ato pranohen dhe interpretohen në Tëitter dhe jashtë saj, ne e kemi pezulluar përgjithmonë llogarinë për shkak të rrezikut të nxitjes së mëtejshme të dhunës”, shkroi Twitter më 8 janar 2021, pas postimeve të Trump se ai nuk do të merrte pjesë në inaugurimin e Joe Biden më 20 janar të atij viti.
Vendimi për të hequr Trump nga platforma u kritikua gjerësisht nga konservatorët, si dhe nga disa progresistë dhe liderë të huaj, duke përfshirë kancelaren e atëhershme gjermane Angela Merkel, si një ushtrim i paligjshëm i pushtetit të korporatës.
