Gati dy muaj para zgjedhjeve, Qeveria Kurti ka nisur procedurat për një fabrikë shtetërore të municionit. Për këtë, Kurti ka themeluar një Komision ndërministror, që do të nis procedurat e negociatave për hapjen e kësaj fabrike. Ministri Maqedonci ka thënë se për këtë janë koordinuar me partnerët dhe se tashmë e kanë pranuar një raport të fizibilitetit nga Ministria e Mbrojtjes e Turqisë. Nga opozita, plani për hapjen e kësaj fabrike është parë si tentim për të mbuluar dështimet në fushat e tjera.
Kosova pritet të hapë fabrikë shtetërore për prodhimin e municioneve. Hapi i parë në këtë drejtim veçse është marrë, ndonëse në fund të mandatit të kësaj qeverie.
Të martën, Kryeministri Albin Kurti ka nënshkruar vendimin për themelimin e komisionin ndërministror që do të fillojë procedurat e negociomit.
“Këtë ditë të rëndësishme për ushtrinë tonë po e shënojmë me një vendim të rëndësishëm, që porsa e nënshkrova, para se të vij këtu në mbledhje dhe me një hap të domosdoshëm besojmë, për të garantuar zhvillimin e qëndrueshëm të saj: do të themelojmë komisionin ndërministror për qëllim të vlerësimit dhe nisjes së procedurave e negociatave lidhur me hapjen e fabrikës për prodhimin e municionit dhe për laborator mbi dizajnimin e fluturakeve pa pilot në Republikën e Kosovës”, ka deklaruar Kurti në mbledhjen e fundit të Qeverisë.
Ky vendim erdhi disa javë pasi Kurti, bashkë me Ministrin e Mbrojtjes, Ejup Maqedoncin, e pritën në zyrë Presidentin e Agjencisë së Industrisë së Mbrojtjes së Republikës së Turqisë, Haluk Gorgun,
Në njoftimin që kishte lëshuar ZKM’ja pas këtij takimi, ishte thënë se është diskutuar rreth mundësive të bashkëpunimit për prodhimin e municionit dhe kushtet që ofron vendi për investitorët nga Turqia.
“Ai tha se Republika e Kosovës do të vazhdojë blerjen e pajisjeve ushtarake nga Turqia, e cila mbetet një prej partnerëve kryesor të Kosovës. Në takim gjithashtu u diskutua rreth mundësive të bashkëpunimit në zhvillimin e industrisë së mbrojtjes, përkatësisht atë të prodhimit të municionit, dhe për kushtet që vendi ynë ofron për investitorë potencialë nga Turqia”, thuhej në njoftimin e lëshuar më 3 shtator.
Mirëpo, është ende e qartë se si do të funksionojë kjo fabrikë e ku do të jetë me lokacion. Gazeta Express ka pyetur Ministrinë e Mbrojtjes për lokacionin, meqë është përfolur se do të jetë aktivizohet fabrika e municionit në Skënderaj, mirëpo deri në momentin e publikimit të tekstit s’ka marrë përgjigje.
Për këtë s’ka dhënë detaje as Ministri i Mbrojtjes, Ejup Maqedonci, në konferencën që mbajti pas mbledhjes së Qeverisë.
Në atë konferencë, Maqedonci tha se kjo është bërë në koordinim me partnerët.
Ai bëri me dije se tashmë kanë pranuar një raport fizibiliteti nga Ministria e Mbrojtjes e Turqisë.
“Për këtë ne kemi zhvilluar në vazhdimësi komunikim, jemi koordinuar me partnerët tanë dhe në këtë rast për hapjen e fabrikës së municionit, fabrikës shtetërore jemi në kontakt dhe kemi pranuar një raport fizibiliteti me prodhues shtetëror nga Ministria e Mbrojtjes së Republikës së Turqisë…”, ka thënë Maqedonci.
“Ne asnjë hap nuk e ndërmarrim pa u konsultuar me të gjithë partnerët, në veçanti me Shtetet e Bashkuara të Amerikës, që janë partneri ynë kryesor strategjik në zhvillimin e kapaciteteve të mbrojtjes dhe sigurisë”, shtoi tutje ai.
Maqedonci tregoi edhe përgjegjësitë e komisionit ndërministror që u krijua për këtë çështje, e që do të kryesohet nga ai.
“Ky Komision do të hulumtojë, do të negociojë dhe do të diskutojë rreth hapjes së një fabrike shtetërore për prodhimin e municionit, që do të jetë fabrika e parë e llojit të tillë në Republikën e Kosovë… Jemi në fazën e finalizimit të këtij projekti dhe Komisioni i cili do të punojë dhe do të kryesohet nga unë ku do të jenë pjesëmarrës Ministri i Punëve të Brendshme, Ministrja e Tregtisë dhe Industrisë, si dhe Ministri i Financave, do të finalizojë kontratën me të cilën ne fillojmë pra punën për hapjen e fabrikës shtetërore të municionit”, tha Maqedonci, në një konferencë pas mbledhjes së Qeverisë”, tha Maqedonci.
Ai tha se fabrika e municionit është projekt i qeverisë dhe nuk ndërhyn në aspektin e planit të tranzicionit të FSK’së.
Maqedonci shtoi se të gjitha prodhimet do të bëhen sipas standardeve të NATO’s.
“Jemi fokusuar që të gjitha prodhimet në Kosovë do të bëhen sipas standardeve të NATO’s…”.
“Përveç me Republikën e Turqisë, ne do të vazhdojmë edhe me vendet e tjera të diskutojmë mundësitë e prodhimit të komponentëve të ndryshëm të armatimit dhe armëve në të ardhmen, mirëpo për ne fokus, Kryeministrin e Republikës së Kosovës dhe Qeverinë, është normalisht municioni që është element bazë për funksionimin e një ushtrie. Jemi në fazën kur do të fillojnë diskutimet më të detajuara ku do të përfshihet edhe çështja e çmimit dhe produkteve që planifikojmë t’i prodhojmë në Republikën e Kosovës”, ka deklaruar tutje ai.
Nga opozita, plani për hapjen e kësaj fabrike, është parë si tentim për të fshehur dështimet në fushat e tjera.
“Për me i fsheh dështimet e njëpasnjëshme që i ka pas kundrejt nevojave bazike kundrejt qytetarëve, qoftë në shëndetësi, ekonomi, arsim, infrastrukturë e të gjitha, ose është kap tek siguria, ose tek veriu, ose siç e pamë sot me dy vendime që ishin krejt ad-hoc’, ka deklaruar zyrtarja e PDK’së, Besa Kabashi Rama, në një intervistë në Pressing të T7.
