Pas takimit të thirrur nga kryeministri në detyrë dhe kreu i Lëvizjes Vetëvendosje, Albin Kurti, me liderët e partive parlamentare për zhbllokimin e ngërçit institucional pas vendimit të Gjykatës Kushtetuese, partitë opozitare reaguan ashpër, duke e quajtur takimin të dështuar dhe pa përmbajtje reale.
Kryetari i LDK-së, Lumir Abdixhiku, tha se “nuk ka pasur asnjë ndryshim qëndrimi nga Lëvizja Vetëvendosje”.
“Kjo është një farsë publike e inskenuar për të krijuar përshtypjen e një vullneti që në fakt mungon“.
Sipas tij, “Kosova mbetet në krizë” dhe se “nevojitet vullnet i sinqertë politik për ta zgjidhur situatën, jo takime për konsum publik”.
Kryetari i PDK-së, Memli Krasniqi, deklaroi se takimi nuk ishte tjetër veçse një përpjekje për të simuluar procesin e konsultimit
“Takimi që u ftua nga Kurti për të aktruar mbushjen e një obligimi që aktgjykimi i Gjykatës Kushtetuese ia jep për konsultime në mirëbesim dhe përgjegjësinë për të gjetur kompromis, rezultoi i pasuksesshëm – sepse situata s’është e njëjtë, por Kurti është i njëjtë“.
Edhe kryetari i Nismës Socialdemokrate, Fatmir Limaj, tha se takimi nuk solli përparim konkret.
“Diskutimi u përqendrua më shumë në interpretimin e aktgjykimit dhe më pak në krizën politike dhe zgjidhjen e saj.”
Ndërsa Albin Kurti mbrojti propozimet e VV-së duke thënë:
“E kam bërë konsultimin konstruktiv dhe bashkëpunimin në mirëbesim, por u pa se konsensus nuk ka“.
Ai shtoi se kompromisi i parë ka qenë:
“Tërheqja e kandidaturës së Albulena Haxhiut nëse në votimin e fshehtë nuk merr 61 vota.”
Dhe propozimi i dytë:
“Një paketë e përbashkët për votimin e kryetarit dhe pesë nënkryetarëve të Kuvendit, sipas nenit 67 të Kushtetutës.”
Takimi përfundoi pa ndonjë marrëveshje, ndërsa kriza politike në Kosovë mbetet e pazgjidhur.
