Një kthesë e papritur dhe e bujshme në të ardhmen e Julián Álvarez. Përballë murit të ngritur nga Atlético Madridi ndaj një transferimi të mundshëm te Barcelona – destinacioni i preferuar prej kohësh nga sulmuesi – argjentinasi ka vendosur t’ia hapë dyert një transferimi te Arsenali para mbylljes së afatit kalimtar të verës.
Sipas asaj që raporton mediumi spanjoll “AS”, sulmuesi argjentinas po e konsideron tashmë Arsenalin si rrugëdaljen më konkrete për t’u larguar nga kryeqyteti spanjoll.
Ekziston, në fakt, vetëdija se me Barcelonën do të jetë e pamundur të arrihet marrëveshja, ndërsa fishkëllimat e tifozëve madrilenë gjatë ditës së djeshme kanë lënë gjurmë.
Gjithmonë sipas medias spanjolle, drejtuesit e klubit londinez kanë mbajtur kontakte të vazhdueshme me rrethin e lojtarit gjatë periudhës së fundit.
Duke e shfrytëzuar vendimin e prerë të Atlético Madridit për të mos negociuar me rivalët e Barcelonës, klubi anglez ka ditur të ndërhyjë në momentin e duhur në përplasjen mes sulmuesit dhe klubit, duke e gjetur një hapësirë të papritur që mund të shndërrohet në transferimin më të madh të ditëve të fundit të “merkatos”.
Megjithatë, mbetet për t’u kapërcyer pengesa kryesore: vullneti i Atlético Madridit, që vazhdon ta konsiderojë 26-vjeçarin një shtyllë të pazëvendësueshme të skuadrës.
I transferuar në vitin 2024 nga Manchester City dhe i blinduar me një kontratë deri në vitin 2030, argjentinasi konsiderohet i paprekshëm nga drejtuesit e klubit spanjoll, të cilët në disa raste e kanë përsëritur synimin për të mos u privuar e nga ylli i tyre. /Gazeta Express
