Në fjalimin e tij para të rinjve të partisë të shtunën, kancelari gjerman Friedrich Merz (CDU) u distancua qartë nga e djathta ekstreme AfD dhe theksoi rëndësinë e Evropës dhe Bashkimit Evropian.
Kancelari gjerman Friedrich Merz (CDU) të shtunën theksoi rëndësinë strategjike të Evropës, duke thënë se e ardhmja e botës po formësohet në këtë kontinent.
Duke folur para të rinjve gjermanë në konferencën “Dita e Gjermanisë” të Unionit të Rinj (Junge Union) në Rust, Baden-Württemberg, Merz tha se kjo nuk ka të bëjë vetëm me Bashkimin Evropian, por me parimet që udhëheqin bashkëjetesën e njerëzve në kontinent.
“E ardhmja e botës krijohet në Evropë,” tha Merz.
“Dua ta përfundoj këtë mendim me ju. Çfarë do të thotë kjo? Ne nuk po shikojmë vetëm veten tonë. Ne nuk po shikojmë vetëm Bashkimin Evropian. Ne po shikojmë një model politik. Po shikojmë një parim. Po shikojmë vendime themelore për mënyrën se si duam të jetojmë së bashku.”
Megjithatë, Merz theksoi se parimet që udhëheqin modelin e Bashkimit Evropian nuk janë zhdukur, pavarësisht sfidave në rritje nga udhëheqjet autoritare.
“Në këtë Bashkim Evropian, ne distancohemi nga socializmi dhe komunizmi dogmatik, nga tregjet e copëzuara dhe—sipas Merz‘nga një stil autoritar i udhëheqjes’.”
“Nëse nuk veprojmë si duhet tani, nëse ua lëmë nacionalistëve ta formësojnë këtë Evropë dhe në thelb ta braktisim atë, atëherë një ditë do të na thuhet se kemi dështuar përballë historisë.”
Ky Bashkim Evropian distancohet gjithashtu nga të gjithë ata “që besojnë se mund të garantojnë sigurinë dhe begatinë e popullit të tyre përmes tregjeve të mbyllura.”
Merz deklaroi gjithashtu “luftë” kundër burokratizimit:
“Pikërisht për këtë arsye jam kaq i përkushtuar për ta mbajtur këtë Bashkim Evropian të bashkuar. Jo ashtu si funksionon tani, jo me këtë mbi-burokratizim. Kjo nuk ishte mënyra se si ishte menduar tregu i vetëm europian: një lumë rregullash që në thelb shprehin vetëm mosbesim ndaj qytetarëve dhe kompanive.”
Nuk është mosbesimi ai që duhet të jetë parimi organizues i politikës europiane, theksoi Merz; ai duhet të jetë “besimi në lirinë, hapjen, aftësinë e njerëzve për të formësuar të ardhmen e tyre me përgjegjësi të vetëdijshme, në mënyrë liberale, tolerante dhe kozmopolite.”
Merz dhe Unioni i të Rinjve nuk bien dakord për reformën e pensioneve
Konferenca e Unionit të Rinj, ku foli Merz të shtunën, ka qenë prej kohësh një bazë fuqie për kancelarin gjerman.
Por dega e të rinjve të partisë së kancelarit kundërshtoi në një masë reformën e propozuar të pensioneve që po shqyrtohet aktualisht nga parlamenti.
“Kjo paketë pensioni, me kostot shtesë prej 120 miliardë eurosh (139 miliardë dollarë) përtej asaj që ishte rënë dakord në marrëveshjen e koalicionit, nuk duhet të lejohet të ndodhë në asnjë rrethanë,” tha Johannes Winkel, kreu i grupit të të rinjve konservatorë Junge Union, gjatë konferencës.
Merz, 70 vjeç, tha se e mbështet ligjin edhe pse ndan disa nga shqetësimet e konservatorëve të rinj. Sipas tij, si kancelar dhe si lider i CDU-së, duhet të marrë parasysh edhe nevojat e të moshuarve.
Gjatë një debati të nxehtë, ai u kujtoi delegatëve:
“Unë duhet të siguroj që ne të mbetemi strukturalisht të aftë për të fituar një shumicë në Republikën Federale të Gjermanisë.” “Detyra e një kancelari federal është të balancojë interesat.”
Ndërkohë, kancelari gjerman theksoi se nuk do të ketë asnjë bashkëpunim midis partisë së tij CDU dhe partisë së ekstremit të djathtë AfD.
“Jo sepse ekziston një ‘muri mbrojtës’ harrojeni atë fjalë! Ne jemi botë larg kësaj partie,” shpjegoi ai. “Nuk kemi asgjë të përbashkët me ta,” tha ai.
